Karnataka nung clerk kati tanur 45 indang school fee agütsür

Kalaburagi, Chiteni (July) 31 (Agencies): Karnataka kübok Kalaburagi nung MPHS Govt High School nung inyaker clerk Basavaraj-i par jala nüngtem nung mapa tajung ka inyaker.
Basavaraj’er jala ya yaküm asü aser pai la bilemtettsü atema langka ka inyaktsü lemtet aser ibaji sensaker kibongtem nungi tetsür kaketshir 45 indang school fees agütsüba lir.
“Taküm nungi iba school nung azünger sensaker kibongtem nungi tetsür kaketshirtem indang fee agütsütsü tenzük” ta Basavaraj-i osangbener dang ashi.
Kalaburagi ya Karnataka kübok jila tila ka lir. Yaküm Sarva Shiksha Abhiyan (SSA)-i Karnataka nung ‘out-of-school’ tanurtem jangjatsü atema mapa inyakdang 2017-18 academic year matongdang kaketshir 63%-i school toktsüba bushitet.
School züngtor toktsürtem teimba ajuruba tesem tanabubaji Kalaburagi ta parnoki bushitet. Iba jila nung kaketshir 1,389-i school toktsü.
Iba ya sensaker kibongtemi pei chirnurtem secondary education züngdaktsütsü makokba ajanga lir. Kaketshir aikati school toktsür pei kibong nung yariteper.
“Onok sensaker kibongtem nungi lir aser onok indang fees ji Basavaraj sir-i par jala tenüng nung agütsür. Onoki par jala teti anisüngzük ngudakjang ta sarasademtsür” ta MPHS Govt High School nung azünger Fathima-i osangbener dang ashi.