Sadhvi Prachi-i Muslim tsür dang Hindu nunger den kibong akümtsü ashir

Lucknow, (Chiteni) July 31 (Agencies): Hindutva lennir Sadhvi Prachi-i ano ashishitep aketba olen ka jembiogo.
Lai Muslim tsürtem dang Hindu nunger den kibong akümtsü aser triple talaq o nikah halala inyakyim nungi jenbutsü atema tamangba yimsü melentsü ayongzük.
“Muslim tsürtemi nikah halala aser triple talaq agientsü atema Hindu tebur den kibong akümtsüla. Taila fatwas agütsüba Maulvi nungertem merenshitsüla kechiyong parnoki loktiliba menentsür” ta Sadhvi-i Mathura nung osangbener den jembidang ashi.
Vishwa Hindu Parishad (VHP) lennir Sadhvi-isa ashiba agi, lai Bareilly nungi Nida Khan dena Muslim tsürtem den ajuruteptsü aser Hinduism agizüktsü atema mepishitsü.
Nida Khan-i yimjak nung triple talaq aser domestic violence inyaksangshi luja jembi aser iba jagi Bareilly Jama Masjid nung Imam-i la anema fatwa ka agütsü.
Yashi, Prachi-isa Congress tir Rahul Gandhi luja jembidang, “Rahul’er party-i sangküm general elections nung general elections mangutsü anungji pai kibong akümtsü atema bilemtsüla” ta ashi.
“Rahul Gandhi-i tim masüba telemtetba agibatem ajanga Congress-i majority mangutsü. Rahul Gandhi kibong kümdaktsütsü atema party-i mapa inyaktsüla” ta VHP lennirisa shisem.
2019 general elections matongdang Ram Mandir yangluba mapa tenzüktsü aser 2019 election nung PM Modi-i takok tulu angutsü, ta laisa metetdaktsü.
“Ram Mandir yanglutsü atema temeshi nisungtem ajak adenshiogo. Ajisüaka, onoki Supreme Court telemtetba atatsü” ta Sadhvi Prachi-i ashi.