Naga yimtenren ken o jembiba maneni nungittsü: Nagaland BJP

Dimapur, Luroi/August 2 (TYO): Naga Peace Accord sign sür 3buba Anniversary atongtsü anogo ka lia Nagaland Bharatiya Janata Party (BJP) Tir, Wb. Temjen Imna Along-i Party tenüng nung, “India sorkar aser Naga yimtenren telok balala tsüngda yimjung ken o jembishinütetba atema ni parnok tenüng asanger, aser maneni party-i iba ken o jembishinü nungita yaritsü,” ta ashi, ta tanü Media Cell, BJP Nagaland-i sangdong ka nung metetdaktsü.
Küm aika yimjung atema jembishinüa aruba ken o ya Nagaland aser Naga nunger aliba tesem nung aliba nüburtemi tembanga jembitsü yongyaa atar,” ta paisa ashi.
Party puri, taoba PM Atal Bihari Vajpayee-i Naga nunger putiotsü aser tensa tangar dang nung khenyongi balaka ta agizükogo aser iba ya tang jembishinüba ken nung tongti onük ka lir, ta ashi.
Tang Centre nung BJP-i aniba sorkari yimjung ken o tembanga jembitsü asoshi telemtetba agiba ya otsüsütsü ka lir aser Naga nungeri iba ya pelashishia agizüker.
Maneni Naga yimtenren telok balalai Naga nunger ajungtsü mechi pei sasep nung maparen balala inyakba agizüktepa longjemba atema, parnoki pelaba metetdaktsü.
Kasa mapang nung BJP Nagaland-i tzünglu kanga sashia aruba ajanga nüburtem takoksa ajuruba aser timtem ajurubatem sasaa bilemba lemsatep. Party puri nüburtem ajak dang süngjema alitsü asoshi akhangba den sorkar agencies aser NGO tem den tekümzükba maparen balala inyakba nung teka amteper inyaktsü asoshi mepishi. Parnokisa iba amala lendong mapang tulusang Tsüngremi asenok kümzüka len anitsü asoshi sarasademba lemsatep.