Mongsenyimti yimdak Tsüngremmong meraketa mongogo

Mongsenyimti nung Tsüngremmong amongba sentong nung tanurtemi sobaliba saisapong kar asayaa sayuba noksa nung angur. Mongsenyimti (Mokokchung), Luroi/August 02,2018.

Mongsenyimti (Mokokchung), August 02(TYO): Nagaland nung terenlok mapa junga inyaka otettsü atema government tipdema aotsü nüngdaker, ta tanü Chief Minister, Wb. Neiphiu Rio-i metetdaktsü.
Pai iba o ya Mongsenyimti yimtak Tsüngremmong benjong sentong nung jembidang metetdakja liasü. Aortem ya Naga nunger ajak rongnung samanir kin lir, aser tanüa state government nung kilonser tazüngpur (Cabinet) asem tashi lir, anungji Nagaland renloktsüba atema Mokokchung district dak tuluka keta lir, ta paisa ashi.
Nagaland nung ‘mini hornbill festival’ ayongzüka amongtsü tenzükba indang ashidang, iba benjong ya district ajak nung akhi Naga nunger benjong den külemi amongtsü asoshi tanü Tsüngremmong benjong amongba nungi tenzüker. Iba benjong amongba ajanga sobaliba tajung mesamadaktsüi benshitsü aser asen limai raliwalirtem longsoa arutsüsa puatsü, ta Rio-isa metetdaktsü.
Tanü yangi Tsüngremmong benjong ayongertemi sempet agütsüba asoshi pelaba metetdaktsüdang Chief Minister-i, state government-i benjongbentsü aser lokti senden nung sempet magizüktsü telemtetba liaka, agütsür asunungji ma ta meshitet agizüker, ta ashi.
Iba kasa benjongmong sentong nung Deputy chief Minister Y.Patton aser Technical Education Minister Wb.Temjen Imna Along natia jembia liasü.
Tanü asenok rongnung yimkümba otsü jembiba ajanga teraksa adoker aser longjema melitetter, anungji itemji yutsür koba agi asenok longjemdaktsür, item onüktemji taintemi jembi tenzüktsüla, iba nungji onok lanurtem anidaktsü, ta Temjen Imna Alongi metetdaktsü.
Iba sentong nung benjong ayongzüker yimten tenüng nung PWD Minister, Wb.Tongpang Ozükümi jembi aser tarur pelaa agizükba o Mongsenyimti putu menden nung mendenbuba aser Organising committee nung tayonger Wb.Meyionen nati metetdaktsü.
Iba benjongmong nung Arrküm Club Mongsenyimti, Longmisa putu, Mopungchuket, Pongching,Merangkong aser New Yaongyimti nungertemi yar tsüngsang sayua liasü.
Kasa benjongmong nung sobaliba saisapong aser arratsütepba agi benjong longsudakja liasü.
Iba benjongmong sentong lapoka Mongsenyimti Baptist Arogo nung Sannüker Wb.Imlimari sarasadem.