Opposition-i election nung paper ballots amshitsü atema mepishitsü

New Delhi, Luroi/August 03 (Agencies): Opposition party balala nungi züngsem 17-i Election Commission of India (ECI) ajurua 2019 Lok Sabha election nung paper ballot dang amshitsü atema temepishiba agutsütsü, ta osang ka ajanga metetdaktsü.
Tamalen Samajwadi Party (SP) national executive senden nunga, taruba Lok Sabha election nung EVMs masü saka ballot papers dang amshitsüla ta bangjema liasü.
RJD otongdar, Manoj Jha-i, “Tesüiba ita ishika tsüngda electronic voting machine nung tamang mekatettsüa lir. Iba ya nüburtemi melungba. Election timi junga agitsüji Election Commission mapa. Tang nüburtem melungjang nung tamang makateter, anungji EVMs mamshitsüla aser tanaben ballot system amshitsüla,” ta metetdaktsü.
Paisa, “Kobi melii Opposition nungi teshimtet telok kati Election Commission ketdangsertem ajurutsü. BJP dak amatari lir. EVM nung timtem aliba kaket zülurtemji BJP lenirtem lir. Anungji onoki EC dang democracy tongtibang asü EVMs tongtibang, ta asüngdangtsü,” ta metetdaktsü.
Opposition-i elections nung ballot papers amshitsü atema akhangba ya tang mezüng masü. Gorakhpur aser Phoolpur by-election nung BJP tamakok ngudaktsüba sülen-a SP party tongti, Akhilesh Yadav-i, EVM machines melamela raksaa amshitettsü, ibaji ajanga BJP-i state aika nung takok angu, ta jembia liasü.
NCP züngsem, Majeed Memon-i, “Onoki longjemer Election Commission ajurutsü. Nübur melungjang nung tamang mekatetra aser EVMs nung 100 shilem nung melung melemtetra paper ballot dangi meyiptsüla,” ta ashi.
“Ballot papers amshira election nung takok mangutsü ta BJP-i tsübua bilemer,” ta Majeed-isa ashi.