Tripura & Meghalaya nung NRC akhanger

Agartala/Shillong, Luroi (August) 3 (Agencies): Assam nung National Register of Citizens (NRC) indang final draft adokba sülen Tripura aser Meghalaya nung lisopur teloktemi kasa mapa inyaktsü takhangba agütsür.
Tripura nung Indigenous Nationalist Party of Twipra (INPT)-i anir takhangba agütsür. “Linük Temzüngi sensopur kümzüka ayutsü ta asüba den NRC ya kanga tapet lir” ta INPT tir Bijoy Kumar Hrangkhwal-i ashi.
INPT-i Bangladeshi nunger jangja meyipa yoktsü aser Inner Line Permit (ILP) system tenzüktsü atema tetenzük nungi takhangba agüja arur. Tripura nung onoki NRC tenzüktsü atema sentong ka tenzüktsü, ta Bijoy Kumar-isa shisem.
BJP-i aniba state sorkari Tripura nungbo NRC mapa meinyaktsü ta shiogo ajisüaka BJP den yariteper Indigenous People’s Front of Tripura (IPFT) indang tangatetbabo balaka lir.
“Onoki Tripura nung taoba mapang NRC inyaktsü takhangba agüja sentongtem agiogo. August 23 nü onoki Khumulwng (Tripura Tribal Areas Autonomous District Council headquarters) nung sentong tulu ka ayonga agitsü” ta IPFT tatong tir Ananta Debbarma-i ashi.
Meghalaya nunga Khasi Students’ Union (KSU)-i NRC mesükba mapa ka inyaktsü atema takhangba agütsür.
KSU tir L Marngar-i anir telok kati Meghalaya deputy chief minister Prestone Tynsong den ajurutepa iba takhangba agütsü.
Yashi Hynnewtrep Youth Council (HYC) züngsemtemia Meghalaya state secretariat-i ao aser Inner Line Permit (ILP) system tenzüktsüba den Meghalaya nunga National Register of Citizens (NRC) yanglutsü takhangba agüja lungkak ait.