Good News film nung Akshay, Kareena, Diljit aser Kiara nungeri tongti shilem agitsü

Luroi/ August 3, 2018 (Agencies): Ita aika yongyaa ataba sülen Karan Johar-i pa indang taruba film nüngja sangdongogo. Iba film ya ‘Good News’ ta nüngja agütsüogo kong Akshay Kumar aser Kareena Kapoor Khan nati tongti shilem agitsü. Küm teku sülen iba film nung tang mezüngbuba Akshay aser Kareena na külemi shilem agiba angutsü. Tena tatembangsa Sabbir Khan indang film Kambakkht Ishq nung shilem agiba nguogo.
Director-produce-i iba osang ya Twitter ajanga sangdonga liasü aser paisa iba film sayatsüba anogo metetdaktsü. ‘Good News’ film nung Diljit Dosanjh aser Kiara Advani natia tongti shilem agitsü. Iba film ya director Raj Mehta lenisuba kübok tangoktsü.
Kumar-i social media ajanga iba osang tajung ya fan tem den lemsatepa liasü. Pai yamai tweet asü: “Ni sangdongba osang ama iba film nüngja ya ‘Good News’ lir. Iba film ya ‘dramedy’ ka asütsü aser 2010, Chiteni/july 19 nü sayatsü.”
Kambakkht Ishq dak alia Kumar aser Kapoor na Ajnabee, Tashan aser Bewafaa film nunger nunga külemi shilem agiogo. ‘Good News’ film nung tenati apuani ama shilem agitsü aser tena tanur abentsü asoshi merangba otsü asütsü. Film ya taküm tatemlen nungi tangok tenzüktsü imlar.
Kasa mapang nung Kumar tang ‘Gold’ film sayatsü renemshiba mapang ka lir. Iba film ya Reema Kagti-i direct asü aser India nunger nüjiso ngur Olympic nung mezüngbuba gold medal hockey asaya nung anguba otsü nung ajemdaker yangluogo.