Netflix-i Baahubali Prequel Series season ana produce asütsü

Luroi/August 3, 2018 (Agencies): India nung taoba ita mezüngbuba series ‘Sacred Games’ sayaba sülen online streaming platform Netflix puri India nunger film tem rongnung sen timtiba aazükba film Baahubali indang series ka yanglutsü asoshi renema lir.
Iba series ya 2015 küm sayaba film indang prequel novel ‘The Rise of Sivagami’ nung ajemdaker yanglutsü.
Director S.S. Rajamouli, shibai Baahubali: The Beginning (2015) aser Baahubali 2: The Conclusion (2017) ta film anaprongla direct süogo pa, Arka Media Works aser Netflix den iba series atema longjemogo, ta hollywoodreporter.com sangdong ka ajanga metetdaktsü.
“Baahubali” indang otsü ya akhi chuba yimli ‘Mahishmati’ mapang chubar kinungertem tsüngda raraba indang lir. Netflix series indang mezüngbuba season nung episode teku alitsü aser iba ya Anand Neelakantan indang kaket ‘The Rise of Sivagami’ nung ajemdaker yanglutsü. Iba kaket ajanga Mahishmati chubatsür Sivagami indang otsü ashir aser shiba yimsüsüba kübok yimti ka chuba yimli küm yangerteter.
“Baahubali” film ana ya atonga tangoka liasü aser film yangluba nung USD million 40 shi indok, koba India nunger film tem rongnung sen timtiba indokba film aküm. Telugu oshi nung iba film tangokba dak alia film ya Tamil, Hindi aser Malayalam oshi nung sayaa liasü.