Dimapur nung tang tensa dak sendakba senden ka amen

Dimapur, Luroi/August 03 (TYO): Tawa anogo aika tzünglu maneni aruba ajanga Dimapur jila aser temeket tesem aika nung tzü metsüngba ajanga nüburtem tebilemtsü akaba mapang ka nung PHED Minister, Jacob Zhimomi-i ayongzüka tanü Dimapur rongdak senden ka menogo, ta ketdangsertem osang ka ajanga metetdaktsü.
Kiyong kar nungbo school aser college campus nung tzü metsüngba ajanga shibangtsüsa kümogo.
Tanü iba senden nung Dimapur DC aser Dimapur Disaster Management Committee Chairman, Sushil Kumar IAS, PWD (Road and Bridges) department nungi Engineer tem, Irrigation aser Flood Control aser Food Corporation of India nungi ketdangsertem dena liasü.
Senden nung Minister-i ketdangsertem dang kanga rongdak süa iba tensa atema mera agia inyaktsü aser district nung alima tzümopung lendong ajanga takoksa anguba asadangtsü tetuyuba agutsüogo.
Tawa alima tzümopung lendong ajanga Nagaland kanga mejungi kongshiogo, aser item tensa ya nisungi mazüoktet, ta shia minister-isa ketdangsertem dang, iba tensa dang nungia tamajungba koktettsü atema asenok renema alitsüla, ta ayongzük.