Venus Williams-i quarter-final tongogo

Luroi/August 03 (Agencies): WTA (Women’s Tennis Association) Premier asayamung final nung Venus Williams-i mezüngbuba shilem agir küm 20 ajungba sülen taküm Silicon Valley Classic tetsür tennis asayamung final tukuben buba takok angutsü nükla yur Venus-i tajungtiba nung shilem agia arudar.
2000 küm kasa asyamung final nung Venus-i la den külem asayar America tsür Lindsay Davenport makok tsüngda, 1998 aser 1999 küm kasa asayamung final ana tashi nung Venus-i Davenport madak tamakok ngua liasü.
2004 aser 2005 küm kasa asayamung final nung Belgium tsür Kim Clijsters aser Davenport na den tamakok mangudang Venus-isa 2002 küm final asayaba nung Kim Clijsters madak takok angu.
Iba sülen 2009 küm kasa asayamung final nung Venus-i France tsür Marion Bartoli madak tamakok angu aser küm ana tejakdang final nungsa Venus-i British tsür Johanna Konta makok. Ajisüaka, lai (Venus) item tamakok nem mekokdaktsü aser tang tashi iba asayamung densema tennis asayamung balala nung shilem agia aruba asenoki ngudar.
Taküm küm asayamung round of 16 asaya nung arishi küm 38 tain aser seed tasembuba nung alila America tsür Venus-i Britain tsür Heather Watson madak 6-4 4-6 6-0 agi takok ngua quarter-final tongtetogo.
Venus, Greek tsür Maria Sakkari den quarter-final asayatsü jangjaogo. Kasa asayamung asaya tanga ka nung Maria-i seed 8 buba nung alila Hungary tsür Timea Babos madak 6-0, 6-1 agi takok nguogo.
Kasa asayamung round of 16 asaya tanga ka nung seed pungu buba nung alila Romania tsür Mihaela Buzarnescu-i America tsür Amanda Anisimova madak 7-5, 2-6, 6-1 agi takok ngua quarter-final tongtetogo.