Tsüngremmung Hornbill Festival tembangogo

Mokokchung, August 3 (TYO): August ka nungi tenzüka anogo asemnü tashi yangi Imkongmeren Sports Complex nung “celebrating our roots” omen nung ajemdaker ‘Tsüngremmung Hornbill Festival Mokokchung 2018’sentong kanga longsotepa aser takok ngua mungogo.
Iba sentong nung tetushi tesemdanger PWD minister, Tongpang Ozüküm-i jembidang, PDA sorkari teinyaktsü sentong aika renema lir, item rongnung tang akaba Mini-Hornbill Festival ya a ka lir aser iba ajanga limapenzürtem puadaktsüba dang masü saka nüburtem tsüngda telungjem aser tesentaktep lidaktsüba den rongsenkettsüng nunga tajangzük kadaktsütsü nükjidong yur iba telemtetba ya agiba lir, ta metetdaktsü.
Mini-hornbill ya benjung penbuba/meroba agi mesüra nübur mashileni anitsü atema ayongerba masü saka Naga kin benjung ajak tang amungba dang nungi tajungtiba nung aser meraketa mungdaktsütsü asoshi sorkari senotsü teyari agüja ayongdaktsür, anungji, nüburtemi iba nungji memangmangdaktsünür, ta paisa jangjashitsü.
Assam sorkari National Registrar of Citizen (NRC) draft adokba ajanga nisung lakh 40 dak tema temeten mali kümogo, ibaji Nagaland netsüng yongsük ana sü asütsü. Item ozüngi memelaba nisungtemji kidanger state-tem nung aittsü menua mali, anungji, ajaki meteta alitsü asoshi paisa tekümdangtsü olen ka ashi.
Foothill road ya tanga nüngja ka agütsür maparen tenzüktsü asayameyangdar, anungji, terenlok maparen balala inyakdang ali kiburtemi ali sotta mayutsü asoshi paisa mepishia metetdaktsü.
Mokokchung Entrepreneurs Consortium (MEC)-i Mokokchung nung aliba business balala inyakertem jenjang ajungketja mapatong balala takok ngua inyakba asoshi MEC dang pelaba o ka shisem. Aji oda, sen aputsür telok balala nungi sen apubatemji ochi shia aotsüla aser mapa meranga inyakra iba nungji temoatsü alitsü, ta paisa ajungshia liasü.
Naga yimden tebilemtsü indang ya tatembang kati arutsü nübur ajaki yongyaseta ataba mapang, Naga nunger obang ka sür lungjema alitsü asoshi paisa tayongzükba ka agütsü.
Sentong nung Ao Kaketshir Mungdang (AKM) tir, Imkongwatii tarur ajak pela agizük. Law & Justice, Border Affairs, Treasuries & Accounts Advisor, Dr. Longrineken-i Tsüngremmung salem o tulu bener arua lemsatep. Telok balalai kentenmenü aser akhi tsürabur yimya nung sobaliba yar tsüngsang balala ia sayu.
Nikongdang tetoktepba balala nung takoker nem senpet agütsüba den rock kenten aser tsüngsangba sentong ka agi aser yangji liso kentener aser tsüngsanger telok balalai shilem agi. Iba sentong nung Mokokchung D.C Sachin Jaiswal IAS tetushi tesemdanger liasü.