Vanguard FC aser New Market nati kokogo

Kohima Football League-2

Kohima, Luroi/August 04 (TYO): Kohima Local Ground nung Kohima Town Club-i ayongzüba Kohima Football League-2 asayamung tesayidak lir. Küptoknü/Saturday asaya nung telok ana, Vanguard Football Tseminyu aser New Market FC nati pei pei tata asaya nung takok nguogo.
Mezüngbuba asaya nung Vanguard FC-i Khriekesa FC Meriema madak goal 3-1 agi takok angu.
Iba asaya nung half-time atongtsü minute ka anünga lia Khriekesa FC team nungi asayar Ruokuovolie Phewhuo (9) ajanga goal ka metsüoktsütet. Ajisüaka half-time sülen asaya tenzüker minute 58buba nung Vanguard FC nungi asyar Mathew Kezhose-i (5) goal ka idakja telok ana tsüngda goal kasa aküm. Iba sülen telok anapronglai toktepa goal idaktsütsü atema meranga asayaba mapang Vanguard FC captain, Yhunshalo Kemp-i (9) minute 64buba nung par telok atema tanabuba goal idaktsü.
Asaya tatemleni arua mapang talila bendenloka asayaba mapang Vanguard FC nungi asayar ka tenüng agi, Sinlo Kent (11) tia makai yirua liasü. Ajisüka Kent-i par telok atema goal tasembuba idakja takok leni ani.
Vanguard FC nungi asayar Kenanthong Kath-i (13) saisaponger dak aketba jakla aser yimyatem mebenshiba ajanga pa nem temerenshi agütsü.
Tanabuba asaya New Market FC aser Twenty XI FC Viswema telok na tsüngda kanga toktepa asaya liasü. Ajisüaka New Market FC teloki Twenty XI FC Viswema madak goal kati takok angu.
Asaya tenzüker minute 6buba nung New Market FC nungi asayar Salu Kulim-i (14) free kick ka indang indanga metsüa par telok atema goal ka idaktsü. Iba asayaba mapang goal idaktsüba dak alaka, New Market FC nungi asayar Kethozhapu Meru (30) aser Twenty XI FC nungi asayar Kevithuto Rhetso (13) nem yellow card aguja liasü.
Luroi/August 6 nü asaya yamai alitsü:
1. Ziekiezou FC vs Sechü Zubza @12:00 ako anüngdang
2. United 16 FC vs Khriekesa FC Meriema @ 2:00 pm nikongdang