Sindhu World Championship final nung lir

Nanjing, Luroi/August 04 (Agencies): Küptoknü tetsür kija badminton asaya World Championship semifinal nung India tsür P V Sindhu-i Japan tsür Akane Yamaguchi madak straight sets takok ngutetba ajanga iba asayamung final-i atonga tanaben iogo.
Taoba küm Glasgow, Scotland nung kasa asayamung final nung Japan tsür Nozomi Okuhara-i koka tanabuba jenjang tongtetla aser Olympics nung silver medal angula, Sindhu-i World No. 2, Yamaguchi madak 21-16, 24-22 agi akok. Tena tsüngta asaya minute 54 nung tembanga liasü.
Sindhu aser Yamaguchi tsüngta taoba mapang asaya aruba nung Sindhu-i trokben aser Yamaguchi-i pezüben koka lir, saka taküm asayaba All England Championship aser taoba küm asayaba Dubai Superseries Final amala tongtibang asayamung nungbo India tsürlai mokoki aruogo.
Taküm tena tsüngta anaben asaya aser anaben prong nung Sindhu-i koka lir. Hyderabad nungi arishi küm 23 tain, Sindhu-i 2013 aser 2014 nung bronze medal ngua lir aser lai Amungnü iba asayamung final nung Olympic champion aser kasa asayamung nung gold medal ana tashi ngua alila, Carolina Marin den asayatsü.
Spain tsür Marin-i Rio Olympics nung Sindhu tsükdakja gold medal ngua liasü. Marin aser Sindhu na asayaba nung Marin-i trokben aser Sindhu-i ponguben koka lir. Tena tsüngta tesüsa asayaba ya Aami/June nung Malaysia Open asayamung alitsü aser iba asaya nung Sindhu-i koka lir.