Kaketshirtemi College nung madener, AKM-i ANCSU pu asemer

Kohima, August 13 (TYO) : Nagaland nung college li atsüngsepa agiba aser college nung azüngertem nem mapang shitak nung scholarship magütsüba timtem aser tamakok anema tejashi sayua tanü Hombar nü nungi tenzüka All Nagaland College Students’ Union (ANCSU)-i anir Nagaland nung college nung azüngertem shinga college-i moi longkak aitba sentong takok ngua agiogo ta ANCSU sangdong ka ajanga tanü metetdaktsüogo.
State government-i parnoki akangba onüktem mataloktsü tashi longkak aitba sentong ya manentsü, anungji sensosanger ajaki parnok timtem nung yaritepdaktsüner ta ANCSU-isa metetdaktsü. Parnokisa kaketshirtemi tashi angaa iba longkak aitba sentong nung shilem agiba asoshi pelar ta metetdaktsü.
Iba longkak aitba sentong dak aketba osangtsüsang ajak osangkaket nung agütsütsü, anungji shingaia olulu meproktsüla ta ANCSU-isa metetdaktsü.
Tang college nung azüngertem ajangzüktsü asoshi ANCSU-i state government nem takangba onüktem agüja alibaji memenui ataloktsütsüla ta Ao Kaketshir Mongdang-i ANCSU pusema metetdaktsüogo.
Kaketshirtemi mapang talangka nungi takangba agüja aruaka tang tashi state government-i kecha meinyaki yutsübaji taoksatsüka lir, iba jagi college nung azüngertem class-i mao kanga akoksadagi ta AKM-isa ashi.
Chief ministeri kaketshirtem nüngdak aser taginübaji yakta anepalua repranger ataloktsütsüla ta AKM-isa takangba ka agütsüogo.