YRS Advisor & NPA ketdansertemi CM semdang

Kohima, Luroi/August 13 (TYO): Advisor for Youth Resources and Sports, MLA Zale Neikha den Sepaktakraw Association tir, Ruokuo Kire aser Nagaland Sepaktakraw Coach & Secretary NSA, Holshe Khrieo nungeri Chief Minister Neiphiu Rio semdanga Naga nunger Sepaktakraw asayartemi ajangtetba tem pa nem metetdaktsüogo.
Chief Minister Rio shiba Nagaland Olympic Association tir lir, pa den pa indang chamber nung sensaksemba mapang Secretariat, Zale-i, Jwensinle Kesen (asayar) aser Puleno Neikha (coach) na taruba 18buba Asian Games nung India tenüng nungi shilem agitsü asoshi shimtetba lemsatepa liasü.
Jwensinle Kesen ya SSB nung constable lir aser Coach Puleno Neikha ya Nagaland YRS Department kübok fixed pay nung Sepaktakraw instructor ka ama inyaker.
Advisor-i CM dang Naga tsür ana ya tang Asian Games atema Indian contingents
den Delhi nung lir aser Luroi/August 15 nü Jakarta-i aotsü aliba ajanga tsüngtong arua pa den majuruteptet ta ashi.
Kasa mapang nung osangbenertem den sensaksemba mapang Chief Minister Rio-i YRS Department aser NSA tenüng asangba den state nem konang tetushi bener arutsüba atema Naga tsür ana tenüng asangba, Neikha-i metetdaktsü.
Rio-i asayar ananem ya teyari ama sen lakh anana agütsütsü nangzük.
Maneni Advisor Neikha-i Naga nunger asayartem dang asaya ka nung dang temulung agüja asayatsü asoshi ajungshi.
Paisa 2019 Tsüklai/Feb National Games nung shilem agitsü aliba Naga nunger asayartem dang state nem konang tetushi bener arutsütsü nükjidong nung tang nungi training agi tenzüktsü asoshi ajungshi.