India-i Independence Day nüngtem nung Nepal nem Ambulance 30 den bus 6 tenla agutsü

New Delhi/Kathmandu, Luroi/August 15 (Agencies): India nunger 72buba Independence Day nüngtem nung tanü India-i Nepal nung hospitals, charity organisations aser shisaliok rejutem nem ambulance 30 aser bus 6 tenla agutsüogo.
Tanü Nepal yimtiba, Kathmandu nung aliba Indian Embassy nung sentong ka alidang Indian Ambassador to Nepal, Manjeev Singh Puri-i item garitem indang jabiji hospitals, charity organisations aser shisaliok rejutem nung ketdangsertem ket nung agutsü.
Tanü Kathmandu nunga India nunger Independence Day sentong ka ayongzüka among.
Puri-i India nunger wako atsüket aser India Tiri yokba osang ka zünga metetdaktsüba den külemi India nungeri lenla balala nung ajangzüktetbatem zünga metetdaktsü.
Iba anogomong sentong nung Puri-isa Indian Armd Forces nungi asürtem kinüngtsü aser chirnurtem nem tetushi agütsüba den külemi Nepal nunger sen million 53.5 indang cheque lema agutsü.
Iba dak alia school aser kaketnang 68 nem kaket agutsüogo, ta Indian Embassy sangdong ka ajanga metetdaktsü.
Iba sentong nung ketdangsertem, Nepal nung aliba India sensotem, osangbenertem aser kaketshirtem densema nisung noklang aika dena liasü.