Anandiben-i Chhattisgarh Angh atema tenangzükba agi

Raipur (Chhattisgarh) Luroi/August 15 (Agencies): Madhya Pardesh Angh, Anandiben Patel-i Chhattisgarh Angh repsema inyaktsü atema tanü tenangzükba agiogo, ta ketdangsertem osang ka ajanga metetdaktsü.
Chhattisgarh Angh, Balramji Dass Tandon asüba ajanga Angh menden tazüng akum.
Tanü Raipur nung aliba Raj Bhavan nung Chhattisgarh High Court Chief Justice, Ajay Kumar Tripathi-i ketdangsüa la nem tenangzükba agidakja liasü.
Tenangzükba agiba sentong nung Chhattisgarh Chief Minister, Raman Singh den state nung tongti ketdangsertem aika dena liasü.
Arishi küm 90, Tandon ya BJP indang parent organisation, Jan Sangh tenteter rongnung ka liasü, aser pa yashi sorkar indang Dr B R Ambedkar Memorial Hospital nung temelungjang tashidak agi asü.
Tandon asüba sülen linük Tir, Ram Nath Kovind-i Chhattisgarh Angh repsema abentsü atema Patel nem mapa nungloktsü, ta yashi Rashtrapati Bhavan nung otongdar kati metetdaktsü.
Chhattisgarh Angh tasen ka meshim tashi Patel-i Angh mapa repsema bena atatsü, ta kasa sangdong ajanga metetdaktsü.