Messi Argentina team nungi taküm masayatsü

Luroi/August 15, 2018 (Agencies): Sangtennü local osang ka ajanga ashiba agi, Captain Lionel Messi Argentina team nungi taruba friendly asaya pezü tashi nung shilem magitsü.
Ballon d’Or ponguben tashi kokteter alisang ya 2016 küm Copa America final nung Chile makokba sülen national team toktsü, saka pa tanaben meyipa arua taküm World Cup nung asayatettsüsa par telok qualify asüba nung teyari tulu agüja liasü.
Argentina team Guatemala den Los Angeles nung Rongjui/September 7 nü asayatsü aser iba sülen anogo pezü lir Colombia den New York nung asayatsü. Iba sülen taküm küm tatemi friendly ana asayatsü koba tang tashi kechi team den asayatsü ajibo jangjaa mali.
“Messi taküm Argentina tenüng nung masayatsü aser pa tarutsüa mejangja,” ta Argentinian daily Clarin sangdong ka ajanga metetdaktsü.
News website Infobae-i ashiba agi, “pa mapang tatsüka atema anisüngzüktsü saka iba tetezüji pa team toktsür ta masü.”
“Kodang mapang tongdir coach tasenbai Messi dak sendakba nung telemtetba agütsütsü,” ta team o tongdar-i AFP dang ashi.
Jorge Sampaoli mapa nungi anenba sülen Lionel Scaloni-i Argentina team coach mapa khen atema melenzüka lir.
Pai iba hopta tatemi United States nung oa asayatsüpurtem tenüng sangdongtsü.
“Iba ya jurila maparen ka lir aser Leo-i mapang agia bilemdangtsüla,” ta Carlos Tevez-i ashi, shiba tang Barcelona aser Boca Juniors na friendly asaya atema Camp Nou nung oa lir.
“Pa meyipa maruyonga tangatetdang. Argentina team-i junga asayadang aser mejungi asayadanga asenoki pa dang aitsür. Iba ya team aser pa atema majung.. Ni iba ya kanga junga angateter kechiyong nia iba amala tensa ajangshiogo,” ta paisa ashi.