72buba Independence Day nü organic bazaar lapok

Dimapur, Luroi/August 16 (TYO): Dimapur district nung 72buba Independence Day amungba tali jangratatemba kümdakja ‘organic bazaar’ ta nüngja agütsür DDSC stadium Dimapur nung stalls aika lapoka mungogo. Iba stall tem ya I-Day sentong tembangba sülen Deputy Chief Minister aser Minister incharge for Home & National Highway, Y.Patton-i lapoktsü.
Iba sentong ya Mission Organic Value Chain Development (MOVCD) for North East Region kübok Agriculture Department puri ayongzük aser Agri aser Allied temi stall 9 tashi lapoka liasü.
Horticulture pur indang stall nung Dream Dragon fruit farm nungi adokba organic Dragon fruit tem kanga sapua alitep. Kasaji state nung ango agi kanga anüngba ajanga nüburtem ango alitsü atema fishery department indang stall nung nongtepa liasü. Land resources, Excise aser tanga department temi parnok indang osettsüset sayutsü atema stall tem lapoka liasü.
Iba dak alia DRDA Dimapur-i achaayanga Self Help Group tem aikati aonsotsü aser handicraft tem yoka liasü. CRPF aser Assam Rifles temia iba anogomung nüngtem nung prangbong aser hadir balala sayaa liasü, ta ketdangser sangdong ka ajanga metetdaktsü.