ANCSU Tir nem anogo latettsüba atema aoksar: ANCSU

Kohima, Luroi/August 16 (TYO): All Nagaland College Students’ Union (ANCSU)-i state sorkar dang Kohima Science College Jotsoma li atsünga agiba ken o tekaraba nung latettsü, scholarship onük aser state tesem ajaklen ali atsünga agiba onüktem atema dang takhangba agutsür, ajisüaka Luroi/August 16, nü osangkakettem nung Jotsoma Village Council (JVC)-i ANSCU Tir nem anogo latettsüba ajanga ANCSU office aoksar, ta tanü ANCSU Education Secretary, Kruto Tetseo-i sangdong ka nung metetdaktsü.
Iba ken o ya nija ken o ama magitsüla ta nenshia metetdaktsür, ta shia ANCSU-i JVC dang, kecha-südanga Union-i nija mesüra sorkar kiojen bendoktsütsü atema asüngdanga mali, ta jangjashitsür, ta sangdong nung shia lir.
ANCSU-i district administration aser state sorkar dang ali survey agiba sülen sorkar reju asem anema inyaktsü asüngdang, aser item reju ji magienra tang aliba sorkar kiojentemi iba college indang ali atsünga magitsü, ta telatetba ka yur sorkari Kohima Science College Jotsoma nem ali tali agutsütsü benok, ta metetdaktsü.
Union-i Kohima Science College ji Jotsoma village jurisdiction nungi belentsüla ta akhang, ta jembibaji khenyongi tai, ta Union-isa metetdaktsü.
ANCSU-isa, Chief Minister den senden amenba anogo nung sorkar ketdangser kati Union dang sorkari reju asemji agientsü jazük, ibaji khenyongi menüngdak; iba ama tia ka nung senden junga magiteti tembang, ta metetdaktsü.
“ANCSU ya tangateter tentet ka lir, anungji nija mesüra telok kar mezüngmeshitsüsa mera kecha agia meinyaktsü. Tesüiba küm aika ANCSU-i state sorkar dang Kohima Science college li atsünga agiba onük latettsü atema takhangba aguja arur,” ta kasa sangdong nung shia lir.
“CMO nung senden amendang union-i, sorkari iba onük latettsü mekokra Kohima Science College jenjang tajungba küma kobi melii University akumtsü atema tanga tesem kati belentsü akok ta ashi. Ajisüaka iba oji züngbong jembiba masü saka sorkar rongshitsü atema o toktepa jembiba ama agitsüla. ANCSU Tiri jangjashitsüogo, anungji state sorkari menotsüba asalentongji Jotsoma Village Council-i angatettsü akok,” ta kasa sangdong ajanga metetdaktsü.