Ajemalurtem

Alima tsütsü bilemdangbo ajemalurtemji tebur saka lapi, anungji yimten aser lokti nung tagidak makaba purtem amai asenoki bilemer. Ajisüaka, Yisuibo ajemalurtemiang alima senmang amangtsü ta Mathi 5:5 nung shia lir. Aji oda, Yisui bilemba o asenoki bilemba naji amsa-am itta lir. Asenokibo alima senmangji terakzür meyong ta bilemer saka Yisui ashir, alima senmangji tashiyim amshia aseni aginüba rakzüka amangba agi mamangtettsü. Aji oda, Yisu tsüngdang ajemalurtemji alima tsütsü lapilarartemji masü mesüra tashimait aser tasümaitertemjia masü. Yisui ashiba ajemalusangji arem shiti mesük, paji tashi kanga tait aser tasüa tait, pai kecha metsübur, ajisüaka kodang nisungtemi paji pua bener arua azüoker, nisung meyirijangia makoktsüba tashi aser tasü tait shiti to pa pua abener arua azüoksang kibur tsüngdang kanga ajemalua akümer. Iba shiti to kasa arem shiti, tesashi aser tetsübutsü mit aketba shiruru, ajisüaka kiburi azüok nungji kiburi ashi anga ajemalua alir. Iba kasaji , ken mapang kabo asenoka nisung tesü, tamajung aser samaro, ajaki tsübua reprangba nisung ser alitsüa akok, saka kodang Yisui asenok apu aser tanüla temeshi nem asenok azüokdaktsü, asenok taküm to akhi memesük tesangwa, taremzük, kumli tajung aser tejungnü nisung akümer. Akhidang, kecha masü nung ain adoka tangar yiruja aliba nisung to tangbo tangar ain adokdang madoker, tangar jashidang mejashir, kümli tasü kümer Tsüngremi mulungba nung dang jajar, kechiyong Tsüngremji dang pa taküm nung kibur ta pai angateta lir aser iba kibursang tashi jagi pa azüoka lir. Aji oda, ajemaluba tetezü asenoki asen temeten bushia tangar den metokteper saka Tsüngrem nem dang toktsür. Ajemaluba tetezü tanüla temeshi nem dang asen taküm aser mapa ajak bendanga agütsür. Aji oda, ajemaluba tetezüji talangka aremzükba aser asen mulung masü saka kibur mulung südaktsüba taküm yimya aser jakliro lir. Mosa kanga ajemaluba nisung liasü. Aji oda, Israel nunger amang agi sangwa küma arem aser lisem lima ajanga anir aruba Mosa dangji asenoki lapi ajatsü asü. Mesüra, ain adoker ozüng longpak jaksaa endokba nisungji lapi asü ? Nisung tsütsü paji teburchi aser samaro. Ajisüaka, Tsüngremi azüokba agi ajemalu nisung aküm. Aji oda, Yirusalem tenla ki menenja shishilembartem aser sen melenertem mena aliba menden meküplokja aina adoksang Yisu Khrista dangji asenoki lapia ta ajatsü asü ? Pai pa arishir dang kecha mashi. Kangki nung angenloktsüba mapanga Pai kotak nungi kotak tenyar meyi aika jakzüker Yihuda nungertem to ajak pua yuteta liasü, saka Pai aremzük, kechiyong yamaji inyaktsübaji tebui memulung. Aji oda, Yisui ajemalua Yihuda nungertem nem kangki nung agenlokdaktsüba ajanga Pa tashi tuluba nung shia aru. Iba jagi tanü asenoki Pa külemer. Pai alima aser kotak senmang amangtsüsa ajemalua pa taküm bendanga agütsü. Tanü asenok akümlirtem dang ajemalua lira, alima senmang amangtsü ta shia yutsüba Tsüngrem o ji tiyazü masü. Nai tendanga tangar dang aremzükdangang, o tamajung tejembi, mapa tamajung teinyak, Tsüngremi mulungba bushiang aser aji inyakang. Atangji, alima nung ali senmang ajakji angutsü. Mathi 5:5 nung nangzükba senmang yabo ali shi taküm ya süitemer amangtsüba kotak senmang indang ashiba masü, saka tang akümli nung amangtsüba ali rongsen indang ashir. Na teburchi aser samaro ta Tsüngremi meteta lir. Na tesangra, shisataka aser tasütait tetsür ta Tsüngremi meteta lir. Ajisüaka, Laishibai ashir, alima nung ali senmang amangtsüsa takar akümtsüba ya tasü aitba agi masü mesüra shisa akaba agia masü, saka ajemaluba agidang amangtsü. Tetezü, ajemaluba ya rongsen aruba lenmang aser iba lenmang nungi anguba rongsenjibo asen senmang asütsü. Ajisüaka, tekümdangtsü kaji samaro mapa inyakba agi mesüra asenok shisa akaba kija agi anguba rongsentemjibo asen senmang masütsü. Ibaji aseni ngua samatsü. Alima senmang amangnüra, Laishibai ashir, AJEMALUANG.