Muzaffarpur shelter home ken o nung CBI-i tesem 12 mita ao

Patna (Bihar), Luroi/August 17 (Agencies): Bihar kübok Muzaffarpur nung shelter home ka nung tetsür 34 tashiyim amshia raksatsüba ken o bushisüngdangba telok, Central Bureau of Investigation (CBI)-i tanep Bihar nung tesem 12 mita ao, aser item rongnung Patna, Muzaffarpur, Samastipur aser Motihari densema lir, ta osang ka ajanga metetdaktsü.
CBI-isa Patna, Samastipur aser Begusarai yimtitem nung taoba mapang state Social Welfare Minister, Manju Verma’er kiojen mita ao.
Muzaffarpur nung shelter home ka nung tetsür 34 tashiyim amshia raksatsüba ken o nung tongti tai tonglokja alisangji Brajesh Thakur lir, aser iba ken o nung pa densema nisung 10 pua lir.
Tanep CBI team kati Patna nung Manju Verma indang official residence 6, Strand Road mita ao.
Osang angazükba agi kidang Manju Verma liasü aser iba ken o nung la dang ghonda aika asüngdangyaogo.
Iba ken o nung taoba Minister, Manju kinüngbu Chandeshwar Verma o Brajesh Thakur na tesendaktep lir. Phone ajanga call asüba records ajanga taküm Aenjeti/January nungi Monupii/May ita tsüngda Brajesh Thakur aser Chandeshwar Verma na tsüngda phone ajanga 17 ben tashi jembia liasü, iba denji külemi Verma-i shelter home ji aiben semdanga kazüba jangjaogo.
CBI-isa Begusarai aser Samastipur na nung Manju Verma’er kiojen trok mita ao.
Osang angazükba agi, CBI-i Begusarai kübok Shripur yimdak taoba minister, Manju’er kidang nungi documents aika puogo.
CBI-isa Muzaffarpur nung Brajesh Thakur’er kinüngertem ki-a mita ogo. Iba dak CBI-i Thakur den külemi inyaksemer Madhu Kumari’er ki-a mita ogo.