Lower Chandmari puri Minister, Metsubu aser HoD dang pelar

Kohima, Luroi/August 17 (TYO): Municipal Affairs Minister, Metsubu Jamir aser Head of the Department, Dr Toshimanen Ozukum nati Kohima jila nung aliba nüburtem, talisa Lower Chandmari Ward sangertem atema mapa tajung inyakja T-Junction lenmang ulushitsüba atema Lower Chandmari Ward sanger ajak tenüng nung tena dang pelaba lemsateper, ta tanü Lower Chandmari Panchayat Kohima Chairman, Lohokhul Sophie-i sangdong ka ajanga metetdaktsü.
“Iba junction nung atsü agi lenmang junga manguba ajanga kümshia gari lendong ataloker. Tawa, Aami/June 16, 2018 nü Fire service gari ka lendong ajurua gari nung mena alir pezüprongla yiru aser anena aliba gari ana raksatsü. Tia kaa item gari nungji driver mesüra passenger mena maliasü,” ta paisa metetdaktsü.
“Iba dak sendakba nung department nung HoD aser Panchayat advisor-i rongdak executive senden ka ayongzük, aser senden nungji iba lenmang ulushitsü atema o lemtep. Ajioda kiyong lenirtemi, iba tebilemtsü rajema alir- ali kibur dang temelaba meshiba nung akokba tashi yaritep, aser lenmang ulushitsü atema atsü bendoktsü asoshi kiburi melunga temelaba agutsü. HoD-i nüngdakba osettsüset achaayang aser lenmang ulushiba maparen tenzük. Tangbo garitem sademsadema senzüteter aser lendonga aika paidoktsü,” ta paisa metetdaktsü.
Ward Panchayat-isa ‘NO PARKING’ zülua toktsüogo, aser tashi mangai gari anena yura senchi sen 500 achitsü, anungji gari amshirtem dang ‘NO PARKING’ zülua aliba tesem nung gari anena mayutsü mepishia metetdaktsür, ta sangdong nungsa shia lir.
Minister aser Department HoD nati nübur atema mapa tajung inyakba asoshi Tsüngremi tena moajang ta sarasademtsür, ta paisa metetdaktsü.