Ozüng alema senotsü amshiba ken o nung Netanyahu den maneni asüngdangya asü

Jerusalem, Luroi/August 17 (Agencies): Ozüng alema tajangzük angutsü mechi senotsü teyari agütsüba ken o aika aliba rongnung ka asoshi Israel Ato Kilonser Benjamin Netanyahu den Rogonü asüngdangya süogo, ta osang ajanga ashi. Item ken o nung aitsüra pa menden nungi atsüngdoktsü.
Local telecoms Bezeq aser iba indang shareholder tuluba, Shaul Elovitch densema senotsü nung ochimashi mapa inyak ta aitsüba asüngdangyatsü asoshi ketdangsürtem Jerusalem nung ato kilonser’er kidangi anepdang aru, ta Israel nungi osangbenertemi ashi.
Iba ama inyaksangshi ya metembang tashi Israel police aser Netanyahu indang office ajanga osang tejangja magütsür. Ken o balala nung temulung melemi bilemba mesüra tenük kuli alir ka ama iba yagi Netanyahu den 12ben buba asüngdangya asür alitsü.
Bezeq ken o nung, Netanyahu-i Elovitch company indang Walla news site nungi pa tenüng ajungketja osang sangdongdaktsünü aser iba melena sen dollar million aika ajangzüktsüsa sorkari sentongtem yanglu, ta aija lir.
Chiteni/July nunga asüngdangyaba sülen Netanyahu indang office ajanga iba ama mapa kecha inyaka mali, ta metetdaktsü.
“Ato Kilonser Netanyahu-i kodanga Elovitch den pa busema osang sangdongtsü asoshi tezüngzüktep yanglua mali aser Walla site ajanga ato kilonser anema dang osang prokshi,” ta Netanyahu indang office ajanga sangdong.
Elovitch ya Tsüklai/February nung Netanyahu’er kibong indang media adviser tejenba, Nir Hefetz den külemi nisung trok densema apu. Netanyahu-i ato kilonser menden den külemi communicatin portfolio ya Yimpoksüi/November 2014 nungi Tsüklai/February 2017 tashi bena liasü aser iba mapang Metsüremi/March 2015 election osang ya Elovitch den longjemer sangdonga aru, ta aitsü.
Chiteni/July nung Netanyahu den ghonda pongu dak tali ken o ka atema asüngdangya süa liasü.