Syria anüdoklen ISIL züngsem 28 tepset: Iraq

Luroi/August 17, 2018 (Agencies): Syria anüdoklen tayimtsü amshia amakba mapang Islamic State of Iraq and the Levant (ISIL mesüra ISIS ta ajar) züngsem 28 tepset Iraq mitkartemi ashi.
Muslim nunger taruba hopta Eid al-Adha anogotem mapang Iraq tesem balala nung amaktsü nükjidong nung suicide bomber adenshiba tesem ka südi ta temulung melemi alidak F-16 fighter jet temi Rogonü amak, ta mitkartemi Associated Press (AP) dang ashi.
Iba mapang ISIL züngsem 20 shi asü aser tanabuba amakdang parnok ti asü.
Iba tesem anaprong ya Iraq arrtslen Syria telung nung liasü, ta ketdangsürtemi ashi.
Ato Kilonser Hyder al-Abadi-i telungpur madak takok nguogo ta sangdongba sülen Iraq air force temi Luchii/December nungi tenzüka Syria nung ISIL teloki amokbanga aliba tesem aika nung makyonga arudagi.
Iraq aser Syria nung ISIL temi tesem tuluka amokbanga liasü aser linük ana nungi parnok kübok alinük tasazük 110,000sq km liasü.
Saka Mongputeni/October tashinung parnok kübok aliba alinük tasazük ya 10,000sq km dang aküm aser item ya timba Syria anüdoklen liasü.