Mizoram nung police-i ILP akangakanga miter

Aizawl, Luroi (August) 17 (Agencies): Mizoram nung Inner Line Permit (ILP) maparen balaka inyakdar aser iba ya non-Mizo ILP malirtem meindoktsü atema lir ta Mizoram DGP Balaji Srivastava-i tanü metetdaktsü.
DGP-isa Inner Line Permit indang telatetbatem reprangshitsü atema special committee ka tentetogo aser parnok dang anogo 21 tsüngda osang agütsütsü tetuyuba agütsüogo.
Assam nung NRC final draft ya Mizoram police agenda teinyaktsü tongtipang rongnung züngokogo aser arrtsülen security maparen kanga akangshiogo ta DGP-isa metetdaktsü.
Assam sorkari Chiteni (July) 30 nü NRC final draft sayaba sülen Assam den kidanger state temi pei pei arrtsü nung security akangshia liasü.
NRC list sayaba sülen Mizoram sorkari arrtsülen police tashi itshi. Assam nungi ozüng alema nisungtem arutsü ta tsübua bilemba agi Zophai, Phaisen aser Saiphum police check gate tem nung police-i mapang telatet makai nüka miter aser Assam-Mizoram arrtsü nung aliba Vairengte aser Bairabi police station tem-a akangshiogo ta Mizoram DGP Srivastava-isa ashi.
Mizoram kübok district ajak nung police-i ILP drive balaka inyakdar. ILP maparen ya non-Mizo ILP malirtem putettsü atema lir aser parnok meyipa yoktsü. Tan ita tsüngda Aizawl Police-i ILP malir nisung 36 tashi puogo.
Mizoram DGP lenisüba kübok committee ka tentetogo aser parnoki Mizoram nung ILP mapa inyakba nung telatetbatem aser metokmeperi alibatem reprangdangtsü.
Luroi (August) 25 nungi Bru nunger meyipa anir arutsü maparen aliba dak rangloker Police department-i Home department den külemi mapa inyaker ta DGP Srivastava-isa ashi.
Külen, Mizoram nung kaketshir tongti telok MZP-i Assam nungi ozüng alema nisungtem aruba mittsü atema Mizoram-Assam arrtsü nung check post lapoktsü ta metetdaktsüogo.