Atal Bihari Vajpayee den asüpila sentong mera keta agiogo

New Delhi, Luroi (August) 17 (Agencies): Delhi nung aliba Yamuna ayongküm nung tanü nikongtsütsü taoba prime minister Atal Bihari Vajpayee den asüpila sentong kanga mera keta agiogo.
Smriti Sthal nung Vajpayee-i par jala ama mesütetba Namita Bhattacharya den lar jala Niharika-i mi tsükloktsü aser idangji pa nem tetushi agüja 21-gun salute agütsü.
BJP indang headquarters nungi Smriti Sthal-i Vajpayee indang mang bener aodang nisung meyirjang aika anidak. Kilometre pezü shi jungnüa Prime Minister Narendra Modi den BJP lennirtem aser minister temi mang abenba gari den külemi jaja.
“Ni o kechi anga mejembir. Iba ya tebu ka asüba ama lir” ta PM Modi-i osangbener dang ashi.
Smriti Sthal nung taoba prime minister tem- Jawaharlal Nehru aser Lal Bahadur Shastri nunger nüngshilungtem yanglua lir aser iba anasa tanü Vajpayee mang arong.
Atal Bihari Vajpayee indang mang yasüng Krishna Menon road nung aliba par kidang ayu. Iba sülen tanep yakta BJP office-i bener ao.
1990s mapang Vajpayee-i asemben tashi linük nung prime minister inyak saka tesüiba küm ishika pa temang mejungi akümba ajanga politics nungi pilaa liasü.
1947 küm India nüjiso anguba sülen kümsük ka tembanga non-Congress nisung kati prime minister inyakbaji Vajpayee liasü. Pai March 1998 aser May 2004 tsüngda BJP aniba sorkar nung prime minister inyak. Pa ya o jembir tajung ka, sangro mejemer ka aser lennir tajung ka liasü aser iba jagi medemer aser tetokteper ajaki pa akhümtsübua liasü.
India Tir Ram Nath Kovind, PM Modi aser Tatong Tir M Venkaiah Naidu nunger anir linük nung tanishir aikati asür Vajpayee den asüpila sentong nung aden.
Rashtriya Smriti Sthal nung national aser regional lennirtem aika aden aser parnok rongnung Lok Sabha Speaker Sumitra Mahajan, BJP lennir tejentem aser Vajpayee den yaritepertem L.K. Advani o Murli Manohar Joshi, RSS tanishir Mohan Bhagwat, Home Minister Rajnath Singh, External Affairs Minister Sushma Swaraj, Defence Minister Nirmala Sitharaman, PDP lennir Mehbooba Mufti, Bihar CM Nitish Kumar, Congress President Rahul Gandhi, Congress lennirtem- Ghulam Nabi Azad, Mallikarjun Kharge aser Anand Sharma, Lok Sabha Deputy Speaker M. Thambidurai, taoba Union Minister A. Raja, MDMK tir Vaiko aser TMC lennir Dinesh Trivedi nungertem liasü.
Maneni bendang linüktem nungi lennir aika aden aser parnok rongnung Bhutan King Jigme Khesar Namgyel Wangchuk, taoba Afghanistan tir Hamid Karzai, Nepal Minister for Foreign Affairs Pradeep Kumar Gyawali, Sri Lanka Acting Foreign Minister Lakshman Kiriella, Bangladesh Foreign Minister Abul Hassan Mahmood Ali aser Pakistan Law Minister Ali Zafar nungertem liasü.
Linüki anogo tenetnü atema asür Atal Bihari Vajpayee mangyima amungtsü.
Nagaland Governor PB Acharya-i taoba Prime Minister asür Atal Bihari Vajpayee den asüpila sentong nung aden.