Diabetes keta alirtem dak cancer tashidak adoktsü ana nung lir

Diabetes tashidak agi tonga alirtem anogoshia ano tashidak talila bendenloksemtsü shisabulua agi sünger alir aser item rongnung tenük nung retinopathy develop asütsüba aser temeyong nung neuropathy develop asütsüba densema lir.
Tang bushisüngda ka ajanga ngutetba agi parnok shisabulu tali bendenlokja diabetes keta alirtem cancer tapu balala agi atongtsü ana nung aliba ngutetogo.
George Institute for Global Health-i ashiba agi, parnoki alima ajunga nung nisung million 20 kanga junga asadangba sülen type 1 aser type 2 diabetes keta alirtem cancer agi atongtsü tangar dang nungi risk tuluba lir ta ngutetogo.
Parnokisa ashiba agi, tebur dang nungibo tetsürtem risk tuluba lir aser diabetes maketba tetsürtem dang nungi diabetes keta alirtem cancer agi atogtsü shilem 27 agi timba lir.
Diabetes tashidak keta aliba tebur ka cancer agi atongtsü shilem 19 agi risk tuluba lir.
“Diabetes aketer dak cancer agi atongtsü risk aliba ya tangbo kanga junga jangjaogo,” ta George Institute for Global Health nungiiba bushisüngdang lenir Toshiaki Ohkuma, PhD-i ashi. “Onoki tang mezüngbuba tetsür diabetes keta alirtem dang cancer adoktsü asoshi ana nung aliba demonstrate süa sayuogo. Parnok dak kidney, oral, aser stomach cancers, aser leukemia agi atongtsü ana nung lir,” ta paisa ashi.
2008 nungi 2012 tashi Australia nung Baker IDI Heart & Diabetes Institute-i Australia, Denmark, Finland, Scotland, aser Sweden nung type 1 diabetes agi tonga alirtem asadanga liasü.
Parnoki stomach, liver, pancreas, kidney, aser endometrium nung cancer atemtsü shilem 25 nungi 50 tashi aliba ngutet.
Kasa bushisüngdang ajanga, type 1 diabetes keta aliba teburtem dak prostate cancer adoktsü asoshi diabetes marketer teburtem dang nungi tajemba aliba tuteta sayu saka liver cancer menatsü anasü agi tali risk aliba ngutet.
Maneni type 1 diabetes agi tonga aliba tetsürtem dak liver cancer atemtsü shilem 78 agi timba lir.
Iba ya kechiba ta süra blood glucose levels tali akümba ajanga DNA raksatsür aser iba ajanga cancer adokdaktsür.
Tanga theory ka nung Sarah Wild, PhD-i ashiba agi, tanü asüng adokba insulin amshia mapang talangka treatment agiba ajanga cancer adokdaktsür sudi.
Source – Internet