Kerala nung tzümetsüng osang angazüka UN tekolakba mepelar

United Nations, Luroi/August 18 (Agencies): UN tekolakba Antonio Guterres-i Kerela nung tzümetsüng arua teraksatsüba adokdaktsüba aser nisung samaba den aika talidak makai akümba ngua temulung korema bilemba lemsatep.
Küm 100 tsüngda Kerala nung tang mezüngbuba tzümetsüng tesashitiba arua lir. Tzünokdang 80 shi moshia yimdar aser nisung 300 dak tema süogo. Tang tashi nung nisung lakh 3.14 dak tema relief camp tem nung jenoka lir.
“India nung tzümetsüng arua aliba onok nungi teyaritepertemi kanga junga asadangdar. Nisung asüba, kiojen raksaba aser nisung aika talidak makai akümba angazüka United Nations mepelar,” ta United Nations otongdar Stephane Dujarric-i sangdong ka ajanga metetdaktsü.
UN dang Kerala nung tsümetsüng lendong dak sendakba nung India-i teyari meshi asü, ta asüngdang dang pai ashiba agi, tang tashi nungbo India sorkari teyari meshia mali.
“Asenok ajaki meteta aliba ama India ya alimaer yimya agi teraksatsüba adokdaktsüba achaayangtsü asoshi kangajunga renema aliba linük ka lir, saka ni onok indang Resident Coordinator den tanü sensaksemogo aser parnoki iba tensa kanga junga asadangdar,” ta pai ashi.