Xi-i North Korea semdangtsü renema lir

Shanghai, Luroi/August 18 (Agencies): North Korea lenir Kim Jong Un-i North Korea kümteter küm 70 ajungba benjungmung nung adentsü asoshi jaokba sülen China tir Xi Jinping-i taruba ita Pyongyang semdangtsü asoshi renema lir, ta Singapore’s Straits Times newspaper sangdong ka ajanga metetdaktsü.
2012 küm pai tir menden agizükba sülen aser China nunger tir kati North Korean yimtiba semdanger küm 13 sülen tang mezüngbuba Xi Jinping-i Pyongyang semdangtsü. 2005 küm Taoba China tir Hu Jintao-i tatembangsa North Koera yimtiba semdanga liasü, ta kasa sangdong ajanga metetdaktsü.
Straits Times-i iba osang ya kechi nungi anagazükar ajibo mashi aser Chinese foreign ministry den ken o ashishitepba nung parnokia telangzüba kecha magütsü.
North Korea nung iba benjung ya Rongjui/Sept 9 nü akatsü asoshi renema lir aser Straits Times sangdong ajanga ashiba agi, Xi-i Pyongyang semdangtsü aliba ya mapang tatongi melenshitsü akok.
China ya North Korea atema shishilembaba tsütsü partner tongtibangtiba lir aser Kim-i taküm China asemben tashi semdangogo aser iba mapang Xi den linük ana tsüngda tesendaktep akangshitsü aser rongsenketsüng nung temelenshi bener arutsü asoshi jembiogo.
United States-i Pyongyang nem nuclear program tem toktsütsü atema nongshitsü asoshi sanctions agüja lir. Iba hopta United States-i China nunger yi aser cigarette product tem North Korea-i belenba company tem nem tenokdangba agütsüogo, kechiyong parnoki tenokdangba agüja aliba anema inyak.