Taila osang mittsü atema telok ka tentet

Mumbai, Luroi/August 18 (Agencies): Osangkaket nung osang taila aser social media nung osang tai prokba mita reprangtsü atema telok ka tentettsü asoshi Mumbai nungi Aeronautical Engineer aser Delhi nungi lawyer ka na longjemogo.
Osang taila mita reprangtsü atema Engineer, Vipul Saxena aser Supreme Court lawyer, Vibhor Anand nati “India Against Bias Media” (IABM) telok tentet.
Iba telok jagi osang taila prokertem anema ken o benoka arudar.
Saxena-i, “Linük nung tamangba yimsü aser loktiliba jenjang raksatsütsü nükjidong nung osang taila prokertem mita reprangtsü atema iba telok tentet,” ta metetdaktsü.
Küm ana tejaklen nungi tenati iba project atema inyaka arur, ajisüaka taoba hopta nungang Twitter nung iba forum tenzük. Iba mapang nungjagi tenzüka parnoki osang taila prokertem anema ken o 20 dak tema benokogo.
Yashi Saxena-i twitter ajanga, “Temerük nisungtem aser khuret metetba media-i onok nungiter aser aibelener nem onok menokdangdaktsütsü. Pei sasa melenshiang mesüra legal inyakyim ajanga onoki melenshitsütsü. Ozü team nung lenla ajaklen nungi mongintem densema lir aser linük nung lawyers team aikati onok nungiter,” ta metetdaktsü.
Arishi küm 54, Saxena-isa, iba tentet ya pressure group mesüra media watchdog ka mesüka lir, saka yimtenren party kecha den-a tesendaktep mali, ta metetdaktsü.
“Onoki mener longkak maittsü mesüra longkak aita mejajatsü, saka item ama nisungtem anema legal inyakyim ajanga inyaktsü, kechiyong onoki linük temzüng nung tamang akar,” ta paisa metetdaktsü.
Anogo ishika tejaklen IABM-i actor Swara Bhasker aser Youtuber, Dhruv Rathi na anema ken o benokogo, ta paisa shisem.