DFL Rongjui 14 nü nungi tenzüktsü

Dimapur, Luroi/August 18 (TYO): Dimapur District Football Association (DDFA) kübok Naga United Football Club-i ayongzüka agitsü aliba Dimapur Football League (DFL) asayamung ya DDSC Stadium nung Rongjui/September 14 nü nungi tenzüka Mongputeni/October 27, 2018 tashi akatsü.
Küptoknü/Saturday DDSC Stadium nung osangbenertem den jembiba mapang asayamung ketdangsertemi ashiba agi, Nagaland nungi sempet tajung aketba asayar den külemi tetoktepa aser tashitait telok adokdaktsütsü nükjidong nung DFL ayongzüker. Iba den külemi DFL asayamung ajanga Dimapur district nung football asayaba yimya tali tajungba yanglushitsü aser taoba tamakok nung ajemdaker tarutsü nung takok jenjang tajungba angutsü atema asayar tasen aser tejen tem iba asayamung sabang nung shilem agiba ajanga maongka angütsü.
“Football asayaba yimyatem temaba jenjang nung asayatetta tali dang ajungketsüsa DFL nükjidong lir, aser iba den külemi DDFA aser Dimapur District Football Referee Association (DDFRA) tetuyuba kübok anidaktsü aji onok tenangzükba lir,” ta ketdangsertemi ashi.
DDFA nung züngsem ka tenüng agi Tsenthungo Lotha-i ashiba agi, DDFA-i iba asayamung achaayanger tem akokba tashi agi yaritsü atema renema lir. Kasa olen ya DDFRA-ia ashi.
Registration atema ketdangsertemi Luroi 17 nü nungi form agütsü tenzükogo aser form ya Luroi 25 tashi angutsü. Iba asayamung nung shilem agitsü jangratemi item mobile no. 8575394092/8730003333 mesüra DDSC Stadium Room no 8 nung tongtepratepang.