Asian Games 2018 kanga takok nung tenzükogo

Jakarta, Luroi/August 18 (Agencies): 18buba Asian Games 2018 Opening Ceremony Gelora Bung Karno stadium, Jakarta nung kanga takok ngua kaogo. Küptoknü aonung pyrotechnic show balala ajanga Jakarta yimti sangwadakja Indonesia nungeri Asia linük balala nungi asayartem agizüka liasü.
Linük tir Joko Widodo-i Gelora Bung Karno Stadium-i motorbike ka nung sanger arua iba asayamung tenzüktsü.
“Linük 45 nungi akalteta jaokertem arutetba atema onok kanga nema atanger aser kanga tushia bilemer,” ta Widodo-i nisung 50,000 shi sentepa alirtem dang ashi. “18buba Asian Games ajanga Asia linüktem-i asenok longjema aliba sayuner,” ta paisa ashi.
Iba sentong nung North aser South Korea nunger wako ka kübok külemi march asü. Maneni Palestine contingent aser Olympic movement dak sendakba nung küm asem tashi tenokdangba agütsür aliba Kuwait team, lokti-i ola tulu adoka pelashishia agizük
Olympic Council of Asia (OCA) tir Sheikh Ahmad Al-Fahad Al-Ahmed Al-Sabah-i par linük tanaben iba asayamung nung shilem agitetba asoshi pelaba lemsatep. “Kuwait nunger asayartem küm aika sülen tang linük tenüng nung asayatetba atema onok kanga nema atanger aser iba ajanga züngsem 45 indang wako ajak abensatsüogo,” ta pai ashi.
Set nung centerpiece-ji volcano model tuluka liasü kong performer parnok 3,600-i sentsü aketba süoshi balala semer tsüngsang balala nung shilem agiba ajanga sentepa aliba lokti aser TV ajanga alima ajunga nung terprangertem jangratemdaktsüogo
Sentong nung maneni taoba Olympic badminton champion Susi Susanti-i Games milenpong bener arua volcano tekolak nung tsükloktsü aser iba sülen fireworks sayua liasü.
Asayamung lapokba sentong nung shilem agirtem rongnung Anggun, , Raisa, Tulus, Edo Kondologit, Putri Ayu, Fatin, GAC aser Kamasean nunger densema liasü.
Maneni asayamung lapokba sentong agiba stadium ya security 9,000 shi anük.
Asayamung ayongertemi ashiba agi, police aser military 100,000-i tekümzükba agütsütsü aser venue kar nungbo facial recognition technology dena amshitsü.
Asayamung tenzükba sentong ya ghonda tesadangka agi, aser iba ita Lombok menoknok nung asür parnok 460 nem minute ka aküm tetushi agüja liasü.
Asian Games 2018 nung national Olympic committee 45 nungi asayar 13,000 shi sports 40 aser discipline 67 nung shilem agitsü.