Nagaland sorkari Kerala nem crore 1; Governor-i lakh 2 agütsü

Society For Naga Students’ Welfare Kerala (SNSWK)-i yaritsü ayongzüker

Dimapur, Luroi (August) 18 (TYO): Nagaland sorkar tenüng nung Chief Minister, Neiphiu Rio-i Kerala nem sen crore 1 teyari agütsütsü ta osang metetdaktsü.
Kerala nung tzümetsüng timtem tulu ajurua lir aser tang tashi nung lendong balala nung nisung 324 tashi taküm samaogo. Iba timtem ajanga nisung 310,000 tashi talidak mali kümogo aser parnok relief camp 2000 dak tema nung jenoka lir.
Chief Minister Rio-isa Nagaland nung alirtem, NGOs, Civil Societies, Arogotem dang relief fund asoshi tenlatsü aser Tsüngremi Kerala nung alirtem yariang ta sarasademtsü ayongzük.
Tzünglu ajanga tzümetsüng timtem bentsür aruba dang masü saka tesem aika nung anentsüh alua lir aser iba ajanga Kerala ajungalen timtemer. Tzünglu kanga aruba ajanga senzüsenbongba nung tetsükdaktsü aika ajurua lir aser taküm samaba den külemi nisungtemi khuret jenti ajurua lir, ta Rio-isa shisem.
Nagaland Governor PB Acharya-ia Kerala Chief Minister’s relief fund nem sen lakh 2 tenla agütsüogo.
Governor-isa Nagaland nung alirtem, telok aser NGO tem dang Kerala nung alirtem yaritsü atema mulungsoa tenlatsü atema mepishia metetdaktsü, ta PRO to Governor sangdong ka nung ashi.
Kerala Chief Minister’s relief fund nem tenla agütsünürtemi tsünglanglen agüja aliba nung yoktsü akok.
Account Number 37319948232, Bank- State Bank of India, Branch- City Branch Thiruvananthapuram, IFS Code- SBIN0070028, Name of Donee: CMDRF
Ano külen, Society For Naga Students’ Welfare Kerala (SNSWK)-i sangdong ka nung Kerala tzümetsüng aser anentsüh khuret indang osang lemsatepba den teyari meshia zülua lir.
Nisung aika talidak mali relief camp balala nung kenoka lir aser aika taküm samaogo. Schools, colleges, hospitals, airports, train stations, dokantem aika tzümetsüng timtem ajanga shibanga lir. Sorkar aser temeimertemi kanga dang meranga teyari agütsüdar saka tzünglu kanga aruba ajanga khuret tuluba akümer, ta SNSWK Tir, Nyeiwang Phom-i sangdong ka nung ashi.
Iba khuret asoshi Nagaland nung aliba arogotem, temeimertem, kija aser teloktemi Kerala state den yariteptsü ayongzüker. Tsüngremi Kerala nung alirtem dang taochi sayuang aser tensa sünepjang ta sarasademtsü mepir, ta paisa ashi.
Iba timtem nung senotsü teyari agüja yaritepnürtemi SNSWK den 8413832255 / 7025934542 ajanga tongteprateptsü akok, ta Nyeiwang Phom-isa ashi.