Takok agütsüba -Matt. 6:5-15

Khristan shia nükjidongji Yisu mesüka alitsübaji asütsüla. Yisu dak aliba jakla tajung ajakji taidok agütsübaji liasü. Yisui temulungjang ajunga agi chichiba taidok agütsüba ama nisung shinga melika.
Asenoki Yisu mesüka linüra Yisu ama tatok agütsüba tashiji ululoka alitsü bushitsüla. Pa alima nung taküm tembanga arudang mepelai bilemba aser tesempa nungi nüji süa liasü. Asenok meimchir tesendaktep nung timtemji asenoki sadoksadoka temulungjang ajak agi taidok magütsütetba aser mulunga maliba ajanga timtem adokdaktsür. Khrista dak amanger ka ama tamajunger dang Pai inyakba ama asenokia taidok agütsütsü angazüktsü Tsüngremi yariang.
Khristai taidok agütsüba shidakbaji kechi ta süngmangtsüa kar. Yangi teyari kuli ka agütsür: Taidok agütsüba tashiji nai kar dang mejungi inyaktsü bilema alidang, shibai anema nai tamajung inyaktsü bilema liasü pa/la nem taidok agütsütsü tashi Tsüngremi agütsür. Anungji ibai Tsüngremi agütsüba tashi ta angatettsü. Aiben tatok agütsütsübaji shibai agütsür aser shibai agizüker anaprongla atema tasak. Aji saka yirua aliba nüji akümtsü asoshi tatok agütsübaji dang lemang lir.
Item ya shisadangang: Ni taidok agütsütsü aser amadoktsü tashiji lir ma? Ni bilemtetaka taidok agütsütsü tashi ulushia lir ma? Ni tatok magütsütetba nisung kar lir ma? Shiba ni anema mejungi inyak pa dang taidok agütsütsü kechiba ni ratamatar ?
Sarasadem: Kü taküm dang shi ang, Ni ne tekümtet. T.Ken 35:3
Tenangzükba: Ni Kibuba na kümzükba, aser na alangzükba ta nai metettsü. Isa. 60:16.