Vajpayee indang mitsü linük kübok ayong ajak nung inoktsütsü: BJP

New Delhi, Luroi/August 19 (Agencies): Taoba mapang Ato kilonser, Atal Bihari Vajpayee arongba mitsüji linük tesem ajaklen ayong nung inoktsütsü, aser iba maparenji asüng nungi tenzüka Haridwar nung aliba Ganga ayong nung tama inoktsütsü, ta tanü BJP-i metetdaktsü.
Asüng temeshi ayong, Ganga nung Vajpayee indang mitsü inoktsüba sentong nung Union Home Minister Rajnath Singh, Uttar Pradesh Chief Minister Yogi Adityanath, Uttarakhand Chief Minister, Trivendra Singh Rawat, tanga state tem nungi Chief Minister tem aser BJP Tir, Amit Shah densema lenirtem aika adentsü, ta tanü BJP lenir, Bhupender Yadav-i New Delhi nung osangbenertem nem metetdaktsü.
Paisa, taoba mapang Ato kilonser indang mitsüji Haridwar nung aliba Shanti Kunj Ashram nungi tenzüka yimdong süa bener jajatsü aser kilometer 5 jajaba sülen Har Ki Pauri ghat tonger mitsüji ayong nung inoktsütsü, ta metetdaktsü.
Luroi 16, 2018 nü Vajpayee arishi küm 93 lia Delhi nung asü, aser Rashtriya Smriti Sthal nung linüki asür nem akhüm tulu agüja tasümang rongdoka liasü.
Yadav-isa BJP lenir, Vajpayee nüngtem nung Luroi/August 20, 2018 nü Delhi nung party ajak sarasadem sentong ka ayongzüka akatsü aser Luroi 23, 2018 nü Lucknow nunga kasa sentong ayonga agitsü, ta metetdaktsü.
New Delhi nung ayongba sarasadem sentong nungji yimtenren party balala ajak nungi lenirtem adentsü, ta paisa shisem.