Centre-i CRPF 7000 Bastar-i yoktsü

New Delhi, Luroi/August 19 (Agencies): Central sorkari West Bengal densema state pezü nung aliba CRPF sepai 7,000 aniteter South Bastar-i yoktsü atema tetuyuba agütsüogo.
Item sepai nungi battalion tenet Chhattisgarh kübok south Bastar nung Maoists telungpur anema operation aotsü atema lemzüktsüogo, ta tawa sorkari sangdong ka ajanga metetdaktsü.
West Bengal, Bihar, Jharkhand state tem nung telungpur anema operation aotsü aser Uttar Pradesh nung security dak sendakba nung CRPF sepaitem nem mapa lemzükja liasü.
Tan hopta Union Home Ministry-i state pezü dangji West Bengal nung battalion asem, Bihar nungi battalion ana aser Uttar Pradesh den Jharkhand na nungi battalion kaka agientsü metetdaktsü.
Official osang ajanga ashiba agi , mapang talangka nungi item states nung Central Reserve Police Force battalions anitettsü atema sentong liasü, aser paramilitary-i Chhattisgarh nung Maoist telungpur anema operation aotsü atema battalion tali nüngdaker, ta Home Minsitry dang mepishiba sülen ministry-i temepishibaji agizük.
Tang Maoists nungi tayongzükba tulutibaji south Bastar nung lir; iba tesem yagi Odisha, Andhra Pradesh aser Maharashtra arrtsütem kongshia lir, aser item tesem nung CRPF sepaitem tali nüngdaker, ta parnoki ashi.
Sukma, Dantewada, Bijapur, Kanker aser Kondagaon district tem nung Maoist-i kanga yakyaka inyaker, aser yaküm küm tatemlen nungi tenzüka CRPF-i telungpur aliba tesem mita aotsü atema camps lapokogo, ta parnokisa ashi.
Tan ita nungi tenzüka item states nung CRPF sepaitem anitettsü aser taküm küm tatemlen tashi nungbo CRPF 7000 shi Chhattisgarh-i yoktsü.
CRPF ya linük nung Central Armed Police Force (CAPF) tulutiba lir aser tang CRPF Battalion 30 shibo Chhattisgarh-i yoka lir.
CRPF battalion ka nung sepai 1,000 lir.