Tezüngzüktep alema inyakogo; longkak aittsü: Manipur University

Imphal (Manipur), Luroi/August 19, 2018 (Agencies): Manipur University community-i parnok telemtetba agiba melenshia, parnoki mezüng lemteta aliba ama longkak aittsü, ta metetdaktsü.
Parnoki ashiba agi, fact finding committee-i University, State aser Central sorkar tsüngda agiba tezüngzüktep alema inyakba ajanga parnoki longkak aittsü atema telemtetba agiogo.
Manipur University Teachers’ Association (MUTA) office nung osangbenertem den jembidang otongdar, Debananda Ningthoujam-i, anogo asemnü tashi senden amenba sülen Luroi/August 16, 2018 nü University, state aser Central sorkari nungi züngsemtem tsüngda tezüngzüktep agi, aser iba mapang nung State Chief Minister, N Biren Singh den council of ministers dena liasü, ta metetdaktsü.
Pai ashiba agi, tezüngzüktep nungji, bushisüngdangba mapang nung Vice Chancellor, Adya Prasad Pandey ji leave nung alitsüla aser inquiry report-i benokba sülen nüngdakba meinyak tashi pa leave nung alitsüla.
Ajisüaka HRD Ministry-i fact finding committee tentettshitsü atema tuyuba nung ibaji meinoksem, ta paisa metetdaktsü.
Talisa HRD Ministry tetuyuba nungji inquiry report ji University nem agutsütsü atema shia mali, kechiyong tezüngzüktep nung ibaji densema lir, ta otongdarisa metetdaktsü.
“Fact finding committee tentetshitsü atema tetuyuba nungji pa leave nung alitsü atema shia mali, anungji Pandey indang nija leave tembangba sülen pai official duty inyaktsüa akok, aser ibajibo tezüngzüktep alema inyakba asütsü,” ta paisa metetdaktsü.
University-i state nüburtem, talisa kaketshirtem dang timtem arema lidaktsüner, kechiyong state nung tekolakba university aser Manipur tarutsü tia kümzüktsü atema tanga lenmang mali, ta mepishia metetdaktsü.