New Chümoukedima lanur aser kaketshirtemi aitsür

Dimapur, Luroi (August) 19 (TYO): Luroi (August) 17 aonung Chümoukedima nung aliba Check-gate mita anükba police-i kuli kecha melii ozü züngsemtem züka merenshiba aitsür ta New Chümoukedima Youth Organization aser New Chümoukedima Village Students’ Union teloktemi metetdaktsü.
Iba aonung Chakhroma Students’ Union President & New Chümoukedima Youth Organization President Rokovi Kruse, Wrestling Secretary Keneingukho Hama aser Shezovil Kera nunger dak züka merenshi. Check gate nung IC aser par Jawan temi kuli kecha melii tai maketba nisungtem dak teka sangshi.
Iba ya parnoki mezüng nungi tasa atonger inyakba mapa ka liasü kechiyong police-i par asem dang asüngdangya kecha mesüi dang teka sangshi. Iba ya IC aser par jawantemi Chümoukedima nunger dak tamajung bilema inyakba mapa ka liasü, ta parnokisa metetdaktsü.
Mapang shitak nung Assistant commissioner of Police tiyongtsüi aitba aser New Chümoukedima Village Council-i yimli sayuba ajanga iba ken o angatettepogo.
Check gate anüktsü atema mapa lemzüktsüba Police Department dang tema tazütsü atema jungtepba aser tesentaktep tajung lir ama mesayutsü metetdaktsür ta Youth Organization aser Students’ Union-isa ashi.
Tarutsü nung ozüng amba ketdangser kari danga tai maketba senso dak teka sangshira, iba amaji onokia telangzüba agütsütsü ta parnokisa kümdangtsü metetdaktsü.