NTC-i ashishitep aketba JEE candidates atema maneni lepshir

Dimapur, Luroi (August) 19 (TYO): Nagaland Tribes Council (NTC)-i ashishitepba aser Chief Secretary-i tetuyuba tejangja agütsüaka Department of Technical Education-i aibelenba memetongshir aser iba ajanga nisung aikati taitsü aketba kulikakettem amer JEE, 2018 tatidang agütsüdaktsü ta NTC-i ashi.
ANCSU aser JEE tatidang agütsüba candidate tsüraburtemi kulitem ashidang NTC kanga aoksa. Tsüraburtemi metokmeperi putetbatemji süoki ia agitsüla kechiyong department-i tashishitsü aketba candidate tem counseling aser nomination mapa inyakra, iba ajanga tarutsü nung tetsükdaktsü tulu ajurutsü, ta NTC Media Cell sangdong ka nung metetdaktsü.
Temsüa maliba candidate aika nem administration-i indigenous certificates agüja lir. Anungji administration-i iba mapa meyipa mereprangshi tashi department-i ashishitep aketba candidate tem sot atatsü mepishir, ta NTC-isa ashi.
NTC-isa administration dang lisopur sensotem indang temeten anema mapa meinyaktsü atema kümdangtsü metetdaktsü.