Manipur University: HRD Ministry-i MoU agizük

Imphal, Luroi (August) 20 (Agencies): Ministry aser state sorkari Manipur University nung lungkak aitertem den agiba MoU Union HRD Minister Prakash Javadekar-i agizükogo, ta tanü HRD joint secretary G C Hosur-i metetdaktsü.
Ministry-i tenangzükba raksa ta tai tonglokja Manipur Vice-Chancellor Professor A P Pandey mapa nungi anenjang ta takhangba agütsüba tesayur aser kaketshirtemi lungkak aitba sentong anena aliba tenzükshitsü ta ashiba sülen anogo ana lir HRD-i iba osang metetdaktsür asütsü.
Manipur University nung registrar in-charge-i sangdong ka agütsüba nung “Bushisüngdangba mapang Pandey nem sodi agütsüba dena MoU nung keta aliba onük ajak HRD Minister-i agizükogo. Anogo 15 nü bushisüngdangba sülen tanüngba mapa metembang tashi Pandey leave nung alitsü” ta shia lir.
Manipur University Student Union (MUSU)-i May 30 nungi Vice Chancellor mapa nungi anenjang ta takhangba agüja lungkak aittsü tenzük. Ajisüaka, Manipur VC-i pa dak tai tongloktsüba ajakji tiyazü ta ashi. Iba sülen MU tesayurtemi kaketshirtem den külemi lungkak aitba nung shilem agi.