HRD Ministry-i online nung NEET anaben agitsü telemtetba meyipa agir

New Delhi, Luroi (August) 21 (Agencies): 2019 nungi National Eligibility cum Entrance Test (NEET) online nung agitsü aser küm nung anaben agitsü ta osang sangdongba sülen ita ka shi lir Centre sorkari iba telemtetba meyipa agiogo.
Tatidangji online ajanga masü saka akhi ama pen-and-paper yimya nung agitsü.
NEET 2019 atema registration maparen November 1 nungi tenzüktsü aser tatidangji May 5 nü agitsü. Ajisüaka, Joint Entrance Exam (JEE) bo küm nung anaben agitsü.
Online registration process: November 1 to November 30, 2018
Download of admit cards: April 15
Date of examinations: May 5
Result date: June 5, 2019.
July 6, 2018 nü HRD Minister Prakash Javadekar-i osangbener senden ka nung CBSE-i masü saka NTA ajanga national-level entrance examinations – NET, NEET, JEE (Mains) ketdangsüa agitsü ta metetdakja liasü.
Javadekar-i sayaba examination calendar nung JEE (Mains) ji January aser April nung agitsü, February aser May nung NEET aser December nung National Eligibility Test (NET) agitsü ta shia liasü.
Ajisüaka, iba osang sangdongba sülen anogo asem lir Health Ministry-i HRD Ministry dang parnok dang asüngdangya mesüi NEET indang osang metetdaktsü ta shidi ka zülu.
Javadekar-i iba osang sangdongba nung khuret 8 ajurutsü akok ta Health Ministry-i züluba shidi nungji shia liasü.
Health Ministry-i benokba onüktem rongnung, online yimya nung tatidang agiba ajanga makamaiter aser yimtsüng nung aliba kaketshirtemi tetsükdaktsü ajurutsü ta asüba ka liasü.