Aadhaar number yimjak nung melemsateptsüla: UIDAI

New Delhi, Luroi/August 22 (Agencies): Tanü Unique Identification Authority of India (UIDAI)-i linük nüburtem dang pei maitsü aser transaction atema marendaki Aadhaar number amshiang, ajisüaka Aadhaar number ji yimjak nungbo melemsateptsüla, ta tekümdangtsü osang ka metetdaktsü.
Iba tekümdangtsü osang medenja Aadhaar ketdangsüba telok, UIDIA-i, nisungtemi debit card, credit card mesüra PAN card number tema yimjak nung mamshir, ta ashi.
UIDAI-isa, “Nü meyong Aadhaar number metetba kija agidangbo shinga na meyirutsütsü. Nü maitsü kuli sayutsü atema nai Aadhaar amshiaka shingaia nü maitsü mamshitettsü,” ta Frequently Asked Questions format ajanga metetdaktsü.
“Nisungtemi passport, voter ID card , PAN card, ration card aser driving licence documents odiodia agutsür. Ajisüaka nisung kari parnok maitsü amshitsüa akok, ta tetsübu nung parnoki item documents mamshir asü? Masü! Parnoki maneni item documents amshir aser ashikülak kar inyakra ozüng benokba agency temi tapet inyaker,” ta UIDAI-isa metetdaktsü.
Aadhaar number kija amshia bank account melapokteter, ta shia UIDAI-i, “Biometric mesüra One Time Password verification medenibo shingaia nü tenüng nung bank account melapoktettsü. Kuli junga memeteti bank account lapoktsüra ibajibo Bank ketdangsertem khuret asütsü,” ta metetdaktsü.
UIDAI-isa, Aadhaar number kija metetba ajanga shingaia nü indang bank account nungi sen magizüktettsü, ta ashi.