Kerala nung Navy-i kümzükba Operations tembangogo

New Delhi, Luroi/August 22, 2018 (Agencies): Kerala nung tzümetsüng kanga ajema joko tesem balala nungi kümzüktsü atema mepishiba mali, ta shia tanü Southern Naval Command-i state nung kümzükba maparen anenogo; Navy temi anogo 14 tashi Kerala nung kümzükba maparen inyaka liasü.
Navy temi ‘Operation Madad’ ya Luroi/August 9 nü tenzüka parnoki state administration aser relief operations nung yaritepa nisung 16,005 tashi kümzükogo, ta Navy osang ka ajanga metetdaktsü.
“Tzümetsüng ajema akümba den külemi kümzüktsü atema temepishiba maliba nung ajemdaker Southern Naval Command-i #OperationMadad atema yoka aliba rescue team ajak jaogo,” ta tanü Defence sangdong ka ajanga ametetdaktsü.
Disaster Management State Control room ajanga ashiba agi, Luroi 8, 2018 nungi tenzüka tzümetsüng lendong nung nisung 231 süogo aser nisung 32 samaogo. Kibong lakh 3.9 nungi nisung lakh 14.50 shi tang tashi relief camp 3,879 nung jenoka lir.
Navy dak alia Army, Air Force aser Coast Guard sepaitemia kümzükba maparen aser teyari agutsüba maparen nung yaritepa liasü.
Tentonü/Hombar Army’s Southern Command chief, Lt Gen D R Soni-i, tensa mesüngjem tashi army temi kümzükba maparen inyaka atatsü, ta metetdakja liasü.