Asür Vajpayee indang mitsü Guwahati tongogo; Asüng Shillong atongtsü

Guwahati/Shillong, Luroi (August) 22 (Agencies): Taoba Prime Minister Atal Bihari Vajpayee mang rongdokba indang mitsü Assam kübok Brahmaputra aser Barak ayongtem nung proktsü.
Assam BJP tir Ranjit Dass-i Delhi nungi Vajpayee indang mitsü bener aru.
Tanü nikongtsütsü 2:30 ako meta pai mitsüji bener Lokapriya Gopinath Bordoloi International Airport atong.
Assam Chief Minister Sarbananda Sonowal-i Dass ket nungi mitsü agizük aser iba mapang Assam minister tem, state BJP ketdangpurtem, MP tem aser BJP lennir tejentem den Vajpayee saklokertem tayimtsü anendak adenshi.
Mitsü enokba pongdangji Dharapur, Gauhati University, Maligaon, Kamakhya Gate, Fancy Bazar, GS Road aser Ganeshguri tesemtem süia bener senzüba sülen Hengrabari party headquarters-i bener aru.
Brihostibarnü pongdang nungi mitsü tera Brahmaputra ayong nung proktsü aser iba sülen August 23 nü Assam minister tem- Ranjit Dutta aser Sum Ronghang na den Assam chief minister legal advisor Shantanu Bharali, BJP lennir Rajdeep Roy, state BJP vice president Biswarup Bhattacharjya nungertemi pongdangji Barak valley-i bener aotsü aser Barak ayong nung proktsü.
Brihostibarnü asür Vajpayee indang mang arongba mitsü Shillong tonga bener arutsü.
Prime Minister, Narendra Modi-i ‘asthi kalash’ ji BJP state tir ajak nem agütsütsü aser New Delhi nung Meghalaya BJP state tir Shibun Lyngdoh-i mitsüji agizüktsü ta yashi Meghalaya Health & Family Welfare Minister, AL Hek-i shia liasü.
Mitsü bener aruba sülen Shillong nung aliba ayong ka nung proktsü ta Hek-isa shisem.
Bharatiya Janata Party, Meghalaya-i taoba Prime Minister indang mitsü bener rally ka agitsü sentong lir.
Brihotisbarnü State BJP tir Shibun Lyngdoh Guwahati nung aliba Lokpriya Gopinath Bardoloi International Airport tonga arutsü.
Kasa anogo nung party züngsemtem Ri-bhoi district kübok Nongpoh nung asür nem tetushi agütsütsü aser iba sülen BJP state party office conference hall nung mitsüji ayutsü.
Hokolbarnü BJP state party office nung party züngsemtemi asür Vajpayee nem tetushi agütsütsü aser iba anogo nungsa tamangba yimsü ajak indang sentong ka ayongzüka lir.
August 25 nü Rilbong Dhobi Ghat anasa Umshyrpia ayong nung mitsüji proktsü.