Pilgrim Hr. Secondary nung Cyber Crime indang workshop agi

Dimapur, Luroi/August 22 (TYO): Tanü digital putu nung social media aser cyber amokmeren ajanga tanurtem kanga kongshir, aser ibaji temelung nung yur tanü Pilgrim Higher Secondary, Dimapur den Harper Collins Publication, India nati senteper Pilgrim Higher Secondary, Kuda B, Dimapur nung Cyber Crime & Security workshop ka agiogo; iba sentong nung shisalen sayurji Rakshit Tandon liasü.
Mezüngbuba session nung tsüraburtem aser guardians densema agi, aser tanabuba session nung class 7-12 nung azünger kaketshirtem den agi aser tatembangbuba session ji tesayurtem den agia sentong tembang.
Iba workshop nung jembiba onüktem rongnung; internet timi amshiba ajanga tajangzük angubatem, internet timi amshiba aser online game asayaba, cyber hygiene, netiquettes aser cyber ozüngtem liasü.
Shisalen sayurisa kaketshirtem dang online chatting, posting aser noksa den ocet lemsatepdang (forwarding) kanga kümdangtsü metetdaktsü.
Shisalen sayur, Rakshit Tandon ya Ethical Hacker, Microsoft Certified Professional, Computer Forensic Expert, advisor, trainer aser Police Academy & State Police Forces of India balala nung member aser consultant lir.