Minister Temjen aser Advisor Zale nati Bethesda Home semdang

Kohima, Luroi/August 22 (TYO): Yashi Education & Technical Education Minister, Temjen Imna Along den MLA aser Youth Resources & Sports Advisor, Zale Neikha nati New Delhi nung Bethesda Bhawan, House of Living Hope semdanga liasü, ta osang ka ajanga lemsatep.
Bethesda Bhawan ya Mizoram nungi tetsür ka tenüng agi Lalsawmliani-i lapok, aser iba Home ya nisung tamajungertem ajanga takoksa ngur alir North East tsürtem tangaleni aotsü mesüra kinüngertem dangi meyipa aotsü atema lenmang malirtem jenokdaktsütsü nükjidong nung lapok.
Iba home lapokba nükjidong ya, item ama nisungtem nem counseling agutsüba ajanga tanela nung taneptsü angutsü aser aser pei yimtsüng nung ama pei ki mesüka lidaktsütsü nükjidong yur lapok.
Bethesda Home semdangba mapang nung Nagaland nungi Minister aser Advisor nati North East nungi takoksa angur tetsürtem zübo aneptsüba aser yariba atema iba home ketdangsertem dang pelaba lemsatep.
Tenatisa takoksa angurtem dang tasü aittsü aser tayongzükbatem madak takok ngua pei taküm asentenshir yangertsü ayongzüka liasü.
Minister Along aser Advisor Neikha natisa Bethesda Home ketdangsertem aser idakji amongertem nem senotsü teyari agutsüogo.