Vanguard-i United 16 akok; Kohima Football League-2

Kohima, Luroi/August 22 (TYO): Kohima Town Club puri ayongzükba tang tasayadak Kohima Football League (KFL) round 11buba tanü asaya nung Vanguard Football Club Tseminyu puri United 16 Lerie madak takok nguogo.
Iba asayamung nung teloktem rongnung ponglang nung liaka Vanguard aser United 16 puri asaya yimya meraksadaktsüi tajungtiba agi asayaogo. Team ana ya ka jenjang 6buba aser ka 7buba nung lir aser Vanguard puri tanü asaya nung United 16 pur 2-1 agi kokogo.
Asaya tenzüker minute 16buba nung Vanguard puri mezüngbuba goal Ketholetuo (23) ajanga idaktsü aser asaya mezüngbuba shilem goal 1-0 nung tembang. Ajisüaka asaya tanabuba shilem nung United 16 puri kanga meranga asayar goal ka agüja aliba ya küpton. Parnok rongnungi Longkhoe (7)-i minute 61buba nung iba goal ya agütsü. Iba sülen Ketholetuo-i minute 80buba nung Vanguard pur atema tanabuba goal idakja parnoki asaya akok.
Asaya nung Vanguard nungi asayar Longkhoe (7) aser United 16 nungi asayar Hrüzhüo nem asaya yimya shidak mebenshiba atema yellow card kaka agüja liasü.
Luroi/August 23 nü asaya yamai alitsü:
1. New Market FC vs Khriekesa FC @ 12Noon
2. Sechü-Zubza FC vs Twenty XI FC Viswema @ 2PM