Kerala nung yimten ken o ka adokogo

Thiruvananthapuram, Luroi (August) 22 (Agencies): Kerala nung tzümetsüng lendong nungi nisungtem kümzükba mapa tatembangleni arudang Bodbarnü yimten tsütsü ken o ka adokogo aser Congress-i aniba UDF opposition aser BJP teloktemi state sorkar dak tai tongloktsür.
Iba lendong ya nisungi adokdaktsüba liasü ta Kerala assembly nung opposition lennir Ramesh Chennithala-i state sorkar aitsü.
Mapang meshitak ka nung tzünoktang 40 tashi lapokba atema bushisüngdang ka asütsüla, ta pai takhangba agütsü.
“Pamba ayong nung tzünoktang 9, Idukki aser Ernakulam district tem nung Periyar nung tzünoktang 11 aser Chalakudy ayong nung tzünoktang 6 lapokba ajanga tesem aika tzü agi metsüngbangtsü ta sorkari memetet liasü” ta paisa ashi.
“Iba mapang tzünglu 41.44% talila aru saka tzünglu ajanga masü osang jelia magütsüi tzünoktang 44 tashi lapokba ajanga tzümetsüng khuret tuluba aküm. Iba ya nisung adokdakba lendong ka liasü” ta Congress lennirisa ashi.
BJP state tir PS Sreedharan Pillai-ia Pinarayi Vijayan-i aniba state sorkar dak tai tongloktsü.
State sorkari mebilemdangi mapa inyak, ta paisa ashi.
Ajisüaka, Kerala State Electricity Board (KSEB) chairman KP Sreedharan Nair-i tai tongloktsüba onüktem magizük aser pai ashiba agi, tzünoktang ketdangsüba board-i mapa shitak dang inyak.
Kümdangtsü osangtem sangoktsüba sülen ang tzünoktangtem lapok. Anungji board dak tai tongloktsütsü nüngdak madoker. Iba mapang ayong teimba ka nung tzü mesemi teyimdak liasü, ta Nair-isa ashi.
Dam safety chairman C N Ramachandran Nair-ia sorkar dak tai tongloktsüba magizüker ta metetdaktsü.
Külen, Special Centre for Disaster Research chairperson aser Jawaharlal Nehru University (JNU) professor Amrita Singh-i “tzümetsüngji tzünglu tali aruba ajanga agi dang adokba masü” ta state sorkar dak tai tongloktsü.
“Iba ya nisungi aibelenba ajanga adokba liasü. Kerala sorkari lendong noktangteta liasü, saka parnoki tarutsü atema mebilemdangi inyak” ta lai Facebook post ka nung metetdaktsü.
Kerala Power minister Mani-i tai tongloktsüba onük ajak reprangshimtsü ta ashi aser külen Revenue minister E. Chandrasekheran-i tang ya tai tongloktsütepba mapang masü saka sorkari relief operations tulutiba inyakba nung temulung agütsütsüba mapang ka lir ta ashi.