Multi-Discipline Sports Centre (MDSC) tembanga yanglutsüla

Dimapur, Luroi (August) 22 (TYO): Taoba mapang State Stadium ta ajaba Multi-Discipline Sports Centre (MDSC) ano tom ka tashi dang yanglua lir aser iba ajanga state sorkari saisapongbaren nung temulung magütsüba kuli sayur.
2005 nungi stadium nung mapa inyaktsü tenzük aser taoba Chief Minister, Neiphiu Rio lenisüba kübok MSDC ya Centre aser state sorkari senotsü teyari agüja küm asem tsüngda yanglutsüba sentong liasü. Ajisüaka, tanü tashi iba mapa metembangteter aser kodang tembanga inyaktsü’ar meshiteter.
MDSC yangluba mapa asoshi tebilemtsü bena ACAUT Nagaland-i tanü MDSC semdang. Iba centre ya ali tasazük acre 64 nung yanglur aser senotsü magütsüba ajanga mapa anendaka lir.
Tanü site engineer-i ashiba agi, stadium indang tasazükji 190 metres x 135 metres lir aser nisung 35,000 amentsü akok.
Sorkari senotsü magütsüyonga construction company indang sen agi mapa inyakdar, ta paisa ashi.
ACAUT züngsemtem aser osangbenertemi contractor Neibu Nagi den ajurutepa sensaksemdang, “taoba Chief Minister, Neiphiu Rio-i iba mapa inyaktsü lemtet aser National Games amungtsü alizüng yur 2006 küm iba centre yanglutsü atema pa nem contract agütsü” ta Nagi-i ashi.
Taoba Planning Commission, Government of India-i küm 6 atema küm shia sen crore 10 agütsü saka iba sülenbo sen kecha melemzüktsü. December 2013 nung pai bill tatembangba agütsü aser iba sülen küm pungu tashi pa nem senotsü kecha magütsü aser iba jagi mapa metembangtet lir, ta Nagi-isa metetdaktsü.
MDSC indang tasazük ya acre 64 lir aser iba nungi acre 15 Sports Authority of India ket nung agüja lir. Parnoki lanurtem training agütsütsü atema infrastructure yanglutsü, ta paisa shisem.
Pai iba specialized project ya tom nung metoktsünür aser sorkari dang sen agütsüra, taruba küm asem tsüngda yangluzüktsü ta Nagi-isa ashi.
Khelo India kübok Meghalaya nungbo stadium 25 yanglutsü atema sentong lir saka Nagaland nungbo iba ama sentong mesüra mapatong kecha mali, ta paisa shisem.
Mezüngbuba shilem nung pa nem cen crore 57 agütsü saka tenangzüktep nung aliba ama contractor nem ita shia sen agütsütsüla, ta paisa metetdaktsü.
Nagi-isa Nagaland Chief Minister dang iba mapatong tembanga inyaktsü atema sen agütsütsü mepishia metetdaktsü.
Iba mapang ACAUT züngsem Tia Longchar-i ashiba agi, Nagaland nung mapatongtem atema lungbo azünger saka mapabo tembanga meinyaker.
Lanur aika dak saisapongtsü sempet lir saka training shitak magiba den facility peria mangur, iba jagi Naga nunger ajaki state Stadium ya yanglutsü kanga yongya atar, ta paisa ashi.
Mapang ka stadium ya ozüng alema mapa inyakba tesem ka ta züngshi saka stadium yanglu tenzükba ajanga iba tenüng tamajungji agien, ta Tia-isa shisem.
Ajisüaka, küm aika stadium yangluba mapa anenba atema kanga sasar aser sorkar taseni iba tebilemtsü süoki ia bilema, iba mapa tembanga inyaktsü imlar, ta ACAUT züngsemisa metetdaktsü.
Tanü iba mapang football coach, Mughatho Sumi dena liasü aser paia ashiba agi, “Naga lanur aika dak football asayatsü sempet lir saka football ground tajung mali.”
“Lanur aika ground tila nung asayar saka iba ajanga parnok tajangzük mangur” ta paisa ashi.
Multi-Disciplinary Sports Centre Dimapur ya sports tapu balala atema lir. MDSC yangluba ajanga Nagaland nung saisapong jenjang tajungba akümba dang masü saka tanga state tem nung ama asayamung tulutem-a ayongzüka mungtettsü akok.